वडवणी, पुढारी वृत्तसेवा : बीड जिल्हा मध्यवर्ती सहकारी बँकेच्या अपहार प्रकरणी २०१३ साली १६९ जणांविरोधात वडवणी पोलीस ठाण्यात गन्हे दाखल करण्यात आले होते. सदरील प्रकराणातील आरोपी न्यायालयात हजर राहत नसल्याने वडवणी न्यायालयाने संबंधित आरोपींविरुद्ध अटक वॉरंट जारी केले आहेत. अटक वॉरंट जारी केल्याने वडवणी तालुक्यात पुन्हा खळबळ उडाली आहे. या प्रकरणातील 3 आरोपींना वडवणी पोलिसांनी अटक करण्यात आली आहे.
याबाबत अधिक माहिती अशी की, जिल्हा मध्यवर्ती बँकेतील कोट्यावधी रुपयांची लुट करून अनेक राजकीय नेत्यांनी आपले घर भरुन घेतले होते. बीड जिल्हा मध्यवर्ती सहकारी बँकेचे तत्कालीन प्रशासक शिवानंद टाकसाळे यांच्या आदेशानुसार जिल्हा मध्यवर्ती सहकारी बँकेच्या घोटाळा प्रकरणी मुख्य कार्यकारी अधिकारी विकास देशमुख यांच्या फिर्यादीवरून वडवणी पोलीस ठाण्यात गुन्हे दाखल करण्यात आले होते.
आरोपी न्यायालयात हजर राहुन न्यायालयीन कामकाजात सहकार्य करत नसल्याने वडवणी न्यायालयाने १६९ जणांविरुद्ध अटक वॉरंट जारी केले आहेत. त्यापैकी तिघांना वडवणी पोलीसांनी ताब्यात घेतले असून उर्वरित आरोपीला ताब्यात घेण्यासाठी वडवणी पोलीसांचे पथक रवाना झाले आहे. उर्वरित आरोपींमध्ये वडवणीतील मोठ्या राजकीय नेत्यांचा समावेश असल्याने एैन ग्रामपंचायत निवडणुकीच्या तोंडावर राजकीय वर्तुळात मोठी खळबळ उडाली आहे.
