केज; पुढारी वृत्तसेवा : जिल्ह्यात मोटारसायकल आणि वाहन चोरीच्या घटना वाढल्या असून, चोर एवढे निर्ढावले आहेत की, सार्वजनिक ठिकाणाहून वाहन चोरीच्या घटना पूर्वी घडत होत्या. परंतु आता चक्क न्यायदेवतेच्या परिसरातूनही वाहन चोरीच्या घटना घडू लागल्या आहेत.
केज न्यायायलताच्या परिसरात पार्क केलेली एका वकिलाची मोटारसायकल चोरीला गेल्याची घटना घडली. केज येथील न्यायालयात वकिली करणारे ॲड. चंद्रकात बचुटे यांनी गुरुवार दि.६ ऑक्टोबर रोजी त्यांची होंडा शाईन ही मोटारसायकल क्र. (एम एच-२३/ए क्यू-०८६०) ही केज न्यायायलयाच्या परिसरात उभी केली होती. दुपारी मध्यंतरानंतर ते त्यांचे न्यायालयीन काम आटोपल्यानंतर घरी जाण्यासाठी निघाले असता, मोटारसायकल उभी केली तेथे जाऊन पाहिले. तेथे त्यांची मोटारसायकल आढळून आली नाही.
त्यांनी परिसरात सर्वत्र शोध घेतला; मात्र मोटारसायकल सापडली नाही. म्हणून त्यांनी गुरूवार दि. ६ ऑक्टोबर रोजी केज पोलीस ठाण्यात तक्रार दिली आहे. त्यानुसार केज पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. सहाय्यक पोलीस निरीक्षक शंकर वाघमोडे यांच्या मार्गदर्शनाखाली पोलीस हेडकॉन्स्टेबल श्रीकांत चौधरी हे पुढील तपास करीत आहेत.
हेही वाचा :