यवतमाळ : पुरात वाहून गेल्याने वृद्धाचा मृत्यू

यवतमाळ; पुढारी वृत्तसेवा : आठवडी बाजार करून घरी परतत असलेला वृद्ध गावाजवळच्या नाल्याच्या पुरात वाहून गेला. ही घटना बुधवारी सायंकाळी घडली. या वृद्धाचा बोरीसिंहजवळ गुरुवारी सकाळी मृतदेह आढळून आला.

माहितीनुसार उत्तम भावसिंग राठोड (वय ६५), रा. रामनगर हे रुई येथे बाजार करण्यासाठी गेले होते. बाजार करून

घरी परतत असताना रुई-रामनगर दरम्यान पुलावर अचानक पाण्याचा लोंढा आला. या लोंढ्यात उत्तम राठोड वाहून गेले. त्यांच्या नातेवाइकांनी शोध घेतला. मात्र, ते आढळून आले नाहीत. गुरुवारी सकाळी बोरीसिंह गावाजवळ गाळात त्यांचा मृतदेह आढळला. याची माहिती ग्रामीण पोलिसांना देण्यात आली. शवविच्छेदन केल्यानंतर मृतदेह नातेवाइकांच्या ताब्यात दिला. उत्तम राठोड यांच्या मागे पत्नी, दोन मुले, असा आप्त परिवार आहे. दरम्यान, गुरुवारीही यवतमाळसह जिल्ह्याच्या विविध भागात पावसाने हजेरी लावली. शहरात सकाळी दीड तास जोरदार पाऊस बरसला.