नवी दिल्ली : आपल्या शरीराचे तापमान वाढते त्यावेळी घाम येऊ लागतो व त्यामुळे शरीराचे तापमान कमी होण्यास मदत मिळते. मात्र, आपल्या याच शरीराचा असा एक भाग आहे, जिथे कधीच घाम येत नाही. तो भाग कोणता, तुम्हाला माहीत आहे का?
शरीरातून घाम येणे ही एक अतिशय सामान्य गोष्ट आहे, सगळ्यांना त्याची इतकी सवय झालेली असते; पण आपल्या शरीराचा एक असाही भाग आहे, जिथे घाम येत नाही हे आपल्या कधीच लक्षात येत नाही. खरं तर, जेव्हा आपलं शरीर गरम होतं तेव्हा आपल्याला घाम येतो, घाम येऊन गेल्यानंतर कमी उकडतं. आपल्या शरीरात घामाच्या ग्रंथी असतात ज्या घाम निर्माण करतात.
इथेच बॅक्टेरिया तयार होतात ज्यामुळे आपल्या घामाला वास येतो; पण आपल्या चेहर्याच्या एका भागावर घामाची ग्रंथी नसते. तो भाग म्हणजे आपले मऊ, मुलायम ओठ! ओठ हा आपल्या शरीरावरील एकमेव भाग आहे, जिथे घाम येत नाही, कितीही उकडलं, गरम झालं तरी ओठांवर किंवा ओठांना घाम येत नाही. ओठांना घाम न येण्याचं सगळ्यात महत्त्वाचं कारण म्हणजे तिथे घामाच्या ग्रंथी नसतात.