ठाणे; पुढारी वृत्तसेवा : पेमेंट गेटवे कंपन्यांचे सॉफ्टवेअर हॅक करून तब्बल 16 हजार 180 कोटी रुपयांचा चुना लावणाऱ्या दोघांना नौपाडा पोलीस ठाण्यात दाखल करण्यात आले आहे. या हॅकरना ठाणे सायबर पोलिसांनी सोमवारी (दि.30) अटक केली. भुपेश दिनेश अग्रवाल (38, बोरिवली, मुंबई) आणि महेंद्र शांतीलाल जैन (34, खेतवाडी, फोर्ट, मुंबई) अशी अटक करण्यात आलेल्यांची नावे आहेत.
ठाण्यातील वागळे इस्टेट परिसरात कार्यालय असलेल्या सेफक्सपे या पेमेंट गेटवे कंपनीचे सॉफ्टवेअर हॅक करून अज्ञात सायबर चोरट्यांनी कंपनीच्या खात्यातून तब्बल 25 कोटी रुपये वळते केल्याचा प्रकार समोर आला होता. या प्रकरणी श्रीनगर पोलीस ठाण्यात गुन्हा दाखल करण्यात आला आहे. या प्रकरणी सायबर चोरट्यांनी नौपाडा पोलीस ठाण्याच्या हद्दीमध्ये बालगणेश टावर स्टेशन रोड ठाणे या पत्त्यावर बँक दस्तऐवज व विविध नोटराईज्ड भागीदारी करारनामे बनवल्याचे उघड झाले आहे.
दस्तऐवजच्या पडताळणीतून या सायबर चोरट्यांनी तब्बल 16 हजार 180 कोटी 41 लाख 92 हजार 497 रूपयांची फसवणूक केल्याचे आढळून आले आहे. या रक्कमेपैकी काही रक्कम परदेशात पाठविल्याचे देखील तपासातून समोर आले. या सायबर चोरट्यांच्या टोळीने देशभरातील अनेक बड्या कंपन्यांचे अशाच प्रकारे सॉफ्टवेअर हॅक करून मोठा आर्थिक फ्रॉड केल्याचे तपासातून समोर आले आहे.
दरम्यान, या गुन्ह्यात सहभागी असणाऱ्या केदार शैलेश दिघे (41), संदीप अनंत नकाशे (38) राम काळूसिंग बोहरा (47) या तिघांना नौपाडा पोलिसांनी नुकतीच गुरुवारी अटक केली होती. त्यानंतर या गुन्ह्यात सहभागी असणाऱ्या भुपेश दिनेश अग्रवाल आणि महेंद्र शांतीलाल जैन या आणखी दोघांना ठाणे सायबर सेलच्या पथकाने सोमवारी अटक केली.
हेही वाचा :