RCB IPL 2026 Champion: IPL 2026 चं विजेतेपद कोण जिंकणार, यावर आता बोलणं घाईचं ठरेल. मात्र, रॉयल चॅलेंजर्स बेंगळुरू (RCB) सलग दुसऱ्यांदा ट्रॉफी जिंकू शकते, अशा चर्चा सुरु झाल्या आहेत यामागचं कारण म्हणजे वेगवान गोलंदाज भुवनेश्वर कुमार आणि त्याच्याशी संबंधित दोन मोठे योगायोग.
10 मे रोजी झालेल्या RCB विरुद्ध मुंबई इंडियन्स सामन्यानंतर हे दोन्ही योगायोग पुन्हा चर्चेत आले आहेत. जर इतिहासाने पुनरावृत्ती केली, तर RCB चं IPL 2026 विजेतेपद जवळपास निश्चित मानलं जाऊ शकतं, अशी चर्चा चाहत्यांमध्ये रंगली आहे.
पहिला योगायोग भुवनेश्वर कुमारच्या फलंदाजीशी संबंधित आहे. मुंबई इंडियन्सविरुद्धच्या सामन्यात शेवटच्या षटकातील चौथ्या चेंडूवर भुवनेश्वर कुमारने शानदार षटकार ठोकला. या षटकारामुळे सामन्याचं चित्रच बदललं आणि RCB च्या बाजूने सामना झुकला.
विशेष म्हणजे, IPL मध्ये भुवनेश्वर कुमारने याआधी शेवटचा षटकार तब्बल 10 वर्षांपूर्वी, म्हणजे 2016 मध्ये मारला होता. तेव्हा तो सनरायझर्स हैदराबादकडून खेळत होता आणि रायझिंग पुणे सुपरजायंट्सविरुद्ध त्याने षटकार ठोकला होता.
दुसरा मोठा योगायोग म्हणजे पर्पल कॅप. IPL 2016 प्रमाणेच यंदाही भुवनेश्वर कुमार सर्वाधिक विकेट्स घेणाऱ्या गोलंदाजांच्या यादीत आघाडीवर आहे. 11 डावांत 21 विकेट्स घेतल्यामुळे सध्या IPL 2026 ची पर्पल कॅप भुवनेश्वरकडे आहे.
जर ही पर्पल कॅप अखेरपर्यंत भुवीच्या डोक्यावर कायम राहिली, जशी ती 2016 मध्ये राहिली होती, तर RCB साठी हा मोठा शुभसंकेत मानला जात आहे.
IPL 2016 मध्ये भुवनेश्वर कुमारने षटकार मारला होता, पर्पल कॅप जिंकली होती आणि त्या हंगामात त्याची टीम सनरायझर्स हैदराबाद चॅम्पियनही ठरली होती.
आता IPL 2026 मध्येही जवळपास तसंच चित्र दिसत आहे. भुवनेश्वरचा षटकार, पर्पल कॅप आणि संघाचं मजबूत प्रदर्शन, हे सगळं पाहता चाहत्यांना 10 वर्षांपूर्वीचा इतिहास पुन्हा घडण्याची आशा वाटू लागली आहे.
जर हे योगायोग खरे ठरले आणि RCB ने यंदाही विजेतेपद जिंकलं, तर बेंगळुरू संघासाठी हा सलग दुसरा IPL किताब ठरेल. आता भुवनेश्वर कुमारचं हे ‘लकी कनेक्शन’ RCB ला ट्रॉफीपर्यंत पोहोचवतं का, हे पाहणं उत्सुकतेचं ठरणार आहे.