मुंबई : भारत आणि श्रीलंकेच्या संयुक्त यजमानपदाखाली टी-२० विश्वचषक २०२६ चा थरार सुरू झाला आहे. या स्पर्धेत दोन वेळा जगज्जेतेपद भूषवणारा इंग्लंडचा संघ ८ फेब्रुवारी रोजी नेपाळविरुद्ध आपल्या मोहिमेची सुरुवात करणार आहे. या सलामीच्या लढतीसाठी इंग्लंडने आपला अंतिम ११ खेळाडूंचा संघ जाहीर केला असून, यात एका दिग्गज वेगवान गोलंदाजाला स्थान देण्यात आले आहे.
नेपाळविरुद्धच्या सामन्यासाठी इंग्लंडने संतुलित गोलंदाजी फळी निवडली आहे. मुंबईतील वानखेडे स्टेडियमवर हा सामना रंगणार असून, येथील खेळपट्टी फलंदाजीसाठी पोषक मानली जाते. अशा स्थितीत गोलंदाजांवर असलेला अतिरिक्त दबाव लक्षात घेता, इंग्लंडने स्टार वेगवान गोलंदाज जोफ्रा आर्चरला संघात स्थान दिले आहे. आर्चरसोबत वेगवान गोलंदाजीची धुरा ल्यूक वूड सांभाळेल.
वानखेडेवर फिरकीची जादू चालवण्यासाठी इंग्लंडने आदिल रशीद, लियम डॉसन आणि विल जॅक्स या तीन फिरकीपटूंना प्लेइंग ११ मध्ये स्थान देऊन आपली रणनीती स्पष्ट केली आहे.
इंग्लंडच्या फलंदाजीची कणा फिल सॉल्ट आणि जोस बटलर ही जोडी असेल. टी-२० क्रिकेटमधील सर्वात आक्रमक सलामीवीर म्हणून या दोघांची ओळख आहे. याशिवाय मधल्या फळीत जॅकब बेथेल, टॉम बँटन आणि कर्णधार हॅरी ब्रूक यांसारखे फटकेबाज फलंदाज संघाला मोठी धावसंख्या उभारून देण्यासाठी सज्ज आहेत. अष्टपैलू खेळाडू म्हणून सॅम करनला संघात स्थान मिळाले आहे.
फिलिप सॉल्ट, जोस बटलर (यष्टीरक्षक), जॅकब बेथेल, टॉम बँटन, हॅरी ब्रूक (कर्णधार), सॅम करन, विल जॅक्स, लियम डॉसन, जोफ्रा आर्चर, आदिल रशीद, ल्यूक वूड.