PV Sindhu Wins Japan Ppen : दोन वेळची ऑलिम्पिक पदक विजेती भारताची स्टार बॅडमिंटनपटू पी. व्ही. सिंधू आज (दि.१९ जुलै) नवा इतिहास रचला. अटीतटीच्या सामन्यात सिंधूने जपानच्या अयाने यामागुचीचा सरळ गेम्समध्ये पराभव करत जपान ओपन सुपर ७५० (Japan Open) जेतेपदावर आपले नाव कोरले. हे तिचे पहिलेच सुपर ७५० जेतेपद आहे. यासह जपान ओपन जिंकणारी ती पहिली भारतीय खेळाडू ठरली असून, तिने गेल्या दोन वर्षांहून अधिक काळापासून असलेला जेतेपदाचा दुष्काळही संपवला आहे.
तीन वेळच्या विश्वविजेत्या यामागुचीचा २१-१७, २१-१७ असा पराभव करत सिंधूने हा ऐतिहासिक विजय मिळवला. २०१९ मधील जागतिक अजिंक्यपद स्पर्धेनंतरचे हे तिचे सर्वात मोठे यश आहे. यापूर्वी तिने २०२४ मध्ये सय्यद मोदी इंटरनॅशनल स्पर्धेत जेतेपद पटकावले होते.
यामागुची ही सहाव्यांदा जपान ओपनच्या अंतिम फेरीत खेळत होती आणि अलीकडच्या काळात तिचे पारडे जड होते. गेल्या चार वर्षांत सिंधूला एकाही पूर्ण झालेल्या सामन्यात यामागुचीला पराभूत करता आले नव्हते. २०२२ च्या थायलंड ओपनमध्ये सिंधूने तिला शेवटचे पूर्ण सामन्यात हरवले होते. या वर्षाच्या सुरुवातीला मलेशिया ओपनमधील त्यांची लढत यामागुचीने पहिल्या गेमनंतर दुखापतीमुळे माघार घेतल्याने लवकर संपली होती.
आज झालेल्या सामन्यात सिंधू पूर्णपणे फॉर्मात दिसली. तिने सुरुवातीपासूनच सामन्याचा वेग स्वतःच्या नियंत्रणात ठेवला. दमदार स्मॅशेस आणि अचूक नेट प्लेचा वापर करत तिने यामागुचीला सामन्यात पुनरागमन करण्याची एकही संधी दिली नाही.
पहिल्या गेममध्ये सिंधूने ३-० अशी दमदार सुरुवात केली होती, पण काही अनपेक्षित चुका आणि यामागुचीच्या आक्रमक उत्तरांमुळे धावसंख्या ३-३ अशी बरोबरीत आली. सुरुवातीला दोन्ही खेळाडूंकडून चुका झाल्या, पण यामागुचीच्या सर्व्हिसच्या चुकीमुळे धावसंख्या ५-५ अशी झाली. येथून सिंधूने सामन्यावर पकड मजबूत करण्यास सुरुवात केली. अत्यंत संयमाने रॅलीज खेळत तिने ८-६ अशी आघाडी घेतली.एका जबरदस्त स्मॅशसह तिने ही आघाडी ९-६ वर नेली, परंतु लागोपाठ झालेल्या चुकांमुळे यामागुचीला पुनरागमन करण्याची संधी मिळाली. जपानी खेळाडूने 'बॉडी स्मॅश' मारत स्कोअर ९-९ केला आणि मध्यांतरापर्यंत सिंधू दोन गुणांनी मागे पडली.
मध्यांतरानंतर भारतीय स्टारने जोरदार पुनरागमन केले. तब्बल ३६ शॉट्सची एक आव्हानात्मक रॅली जिंकत तिने धावसंख्या ११-११ अशी बरोबरीत आणली. त्यानंतर एका क्रॉस-कोर्ट स्मॅशच्या जोरावर तिने १३-१२ अशी आघाडी घेतली. नेटवरील उत्कृष्ट खेळ आणि प्रतिस्पर्ध्याला चुका करण्यास भाग पाडत सिंधूने १६-१२ अशी मजबूत आघाडी घेतली.
यामागुचीनेही हार न मानता चिवट खेळ केला आणि धावसंख्या १७-१५ वर आणली. यादरम्यान दोन्ही खेळाडूंमध्ये ३८ शॉट्सची थरारक रॅली पाहायला मिळाली, ज्यानंतर स्कोअर १७-१७ असा बरोबरीत आला. मात्र, निर्णायक क्षणी सिंधूने आपला खेळ उंचावला. एका अचूक क्रॉस-कोर्ट स्मॅशमुळे तिने १९-१७ अशी आघाडी घेतली आणि अखेर पहिला गेम २१-१७ असा नावावर केला.
पहिल्या गेममधील हाच आत्मविश्वास सिंधूने दुसऱ्या गेममध्येही कायम ठेवला. तिने कोर्टच्या पुढील भागावर नियंत्रण मिळवत यामागुचीवर दबाव वाढवला. सामन्यातील सर्वाधिक अशा ४४ शॉट्सच्या रॅलीचा शेवट यामागुचीच्या शॉट बाहेर जाण्याने झाला आणि सिंधूने सलग सहा गुण घेत ८-३ अशी मोठी आघाडी घेतली.यानंतर सिंधूच्या काही चुकांमुळे यामागुची ८-७ अशी जवळ आली, पण सिंधूने लगेचच स्वतःला सावरत मध्यांतरापर्यंत ११-७ अशी आघाडी कायम ठेवली. यानंतर जपानी खेळाडूचा ताळमेळ सुटलेला दिसला आणि तिचे अनेक शॉट्स कोर्टबाहेर गेले. एका व्हिडिओ रिव्ह्यूमध्येही तिचा अंदाज चुकल्याने सिंधूने १४-७ अशी दणदणीत आघाडी घेतली. शेवटच्या काही क्षणांत सिंधूच्या खेळावर दडपण दिसले आणि तिचे दोन शॉट्स नेटला लागल्याने यामागुची १९-१७ वर पोहोचली. पण घरच्या मैदानावर खेळणाऱ्या यामागुचीने पुन्हा एकदा शॉट बाहेर मारत सिंधूला तीन चॅम्पियनशिप पॉइंट्स बहाल केले.