कोलकाता : भारत आणि दक्षिण आफ्रिका यांच्यातील तीन सामन्यांची एकदिवसीय मालिका सध्या १-१ अशी बरोबरीत आहे आणि दोन्ही संघांसाठी ६ डिसेंबर रोजी विशाखापट्टणम येथे होणारा अखेरचा सामना निर्णायक असणार आहे. या मालिकेतील भारतीय फलंदाजांची कामगिरी चांगली असली तरी, गोलंदाजांनी मात्र निराशाजनक कामगिरी केली आहे, ज्यामुळे टीम इंडियाची चिंता वाढली आहे. विशेषतः वेगवान गोलंदाज प्रसिद्ध कृष्णा याचे प्रदर्शन गेल्या काही सामन्यांमध्ये खूपच खराब राहिले आहे.
रायपूर येथील मागील एकदिवसीय सामन्यात भारतीय संघ ३५९ धावांचे मोठे लक्ष्यही वाचवू शकला नाही आणि ४ गडी राखून पराभूत झाला. या पराभवासाठी प्रसिद्ध कृष्णाची गोलंदाजी मोठ्या प्रमाणात कारणीभूत ठरली. त्याने अवघ्या ८.२ षटकांत तब्बल ८५ धावा खर्च केल्या. जर त्याने संपूर्ण १० षटके टाकली असती, तर कदाचित धावांचा आकडा शंभरी पार गेला असता. रांची एकदिवसीय सामन्यातही त्याने ६.५४ च्या इकोनॉमी रेटने ४८ धावा दिल्या होत्या. कृष्णाच्या या खराब कामगिरीमुळे कर्णधार केएल राहुल देखील मैदानावर त्याच्यावर नाराज झालेला दिसला.
प्रसिद्ध कृष्णाने देशांतर्गत क्रिकेटमध्ये उत्कृष्ट कामगिरीच्या बळावर भारतीय संघात स्थान मिळवले, परंतु आंतरराष्ट्रीय स्तरावर त्याचे आकडे अत्यंत निराशाजनक आहेत. त्याच्या सातत्याने महागड्या ठरणाऱ्या गोलंदाजीमुळे चाहते त्याला ‘धावांची उधळपट्टी करणारे मशीन’ असे म्हणू लागले आहेत.
कसोटी : ६ सामने : २२ विकेट्स : ३४.३६ सरासरी : ४.७२ इकॉनॉमी रेट
एकदिवसीय : २० सामने : ३३ विकेट्स : २८.०९ सरासरी : ५.९८ इकॉनॉमी रेट
टी-२० : ५ सामने : ८ विकेट्स : २७.५० सरासरी : ११.०० इकॉनॉमी रेट
टी-२० मध्ये सर्वात महागडा भारतीय गोलंदाज: नोव्हेंबर २०२३ मध्ये ऑस्ट्रेलियाविरुद्ध झालेल्या गुवाहाटी टी२० सामन्यात कृष्णाने तब्बल ६८ धावा खर्च केल्या होत्या, जो टी-२० आंतरराष्ट्रीय सामन्यात कोणत्याही भारतीय गोलंदाजाकडून करण्यात आलेला सर्वात महागडा गोलंदाजी स्पेल आहे.
८.२ षटके : ८५ धावा (इकॉनॉमी रेट १०.२०) : २ विकेट्स
७.२ षटके : ४८ धावा (इकॉनॉमी रेट ६.५४) : १ विकेट
७ षटके : ५२ धावा (इकॉनॉमी रेट ७.४२) : १ विकेट
५ षटके : ४५ धावा (इकॉनॉमी रेट ९.००) : १ विकेट
६ षटके : ५६ धावा (इकॉनॉमी रेट ९.३३) : २ विकेट्स
प्रसिद्ध कृष्णाची ही आकडेवारी स्पष्ट करते की, तो मधल्या आणि अखेरच्या षटकांत धावा रोखण्यात अपयशी ठरत आहे, ज्यामुळे टीम इंडियावर मोठा दबाव येत आहे. निर्णायक सामन्यात संघ व्यवस्थापन त्याला पुन्हा संधी देणार की नाही, याकडे आता सर्वांचे लक्ष लागले आहे.
प्रसिद्ध कृष्णाच्या या निराशाजनक कामगिरीमुळे भारतीय संघ व्यवस्थापनाला ६ डिसेंबरच्या निर्णायक सामन्यासाठी गोलंदाजीच्या रणनीतीवर पुन्हा विचार करावा लागणार आहे.