Lionel Messi Record: 2026 फिफा विश्वचषकात अर्जेंटिना आणि इजिप्त यांच्यात झालेल्या अत्यंत रोमांचक सामन्यात लिओनेल मेस्सीने आणखी एका ऐतिहासिक विक्रमाची नोंद केली. अर्जेंटिनाने 0-2 अशा पिछाडीवरून दमदार पुनरागमन करत इजिप्तचा 3-2 असा पराभव केला. या विजयासह मेस्सीने विश्वचषकातील गोलसंख्येबाबत एक मोठा टप्पा गाठला.
सामन्याच्या 15व्या मिनिटाला यासिर इब्राहिम याने गोल करत इजिप्तला आघाडी मिळवून दिली. त्यानंतर अवघ्या चार मिनिटांनी अर्जेंटिनाला पेनल्टी मिळाली. मात्र, लिओनेल मेस्सीला ही संधी साधता आली नाही. त्याचा पेनल्टी किक गोलपोस्टमध्ये न गेल्याने फुटबॉलप्रेमींना मोठा धक्का बसला.
दुसऱ्या हाफमध्ये इजिप्तने पुन्हा एकदा आक्रमक खेळ करत 67व्या मिनिटाला मुस्तफा जीको याच्या गोलच्या जोरावर 2-0 अशी आघाडी घेतली. त्या वेळी अर्जेंटिनाचा पराभव जवळपास निश्चित मानला जात होता.
मात्र, त्यानंतर अर्जेंटिनाने जबरदस्त पुनरागमन केले. 79व्या मिनिटाला क्रिस्टियन रोमेरो याने हेडरद्वारे पहिला गोल करत संघाच्या आशा जिवंत ठेवल्या. त्यानंतर 83व्या मिनिटाला लिओनेल मेस्सीने शानदार गोल करत सामना 2-2 असा बरोबरीत आणला. अतिरिक्त वेळेत एन्झो फर्नांडेझ याने निर्णायक गोल करत अर्जेंटिनाला 3-2 असा थरारक विजय मिळवून दिला.
या सामन्यातील गोलमुळे लिओनेल मेस्सीने एका फिफा विश्वचषक स्पर्धेत 8 गोल करणारा अर्जेंटिनाचा दुसरा खेळाडू होण्याचा मान मिळवला. याआधी 1930 च्या पहिल्या विश्वचषकात गिलेर्मो स्टॅबिले यांनी एका स्पर्धेत 8 गोल केले होते. आता मेस्सीने त्यांच्या विक्रमाशी बरोबरी केली आहे.
2026 फिफा विश्वचषकात लिओनेल मेस्सी सध्या 8 गोलांसह सर्वाधिक गोल करणारा खेळाडू ठरला आहे. त्याच्या पाठोपाठ नॉर्वेचा स्टार स्ट्रायकर एर्लिंग हालंड 7 गोलांसह दुसऱ्या स्थानावर आहे. अर्जेंटिनाच्या या दमदार विजयामुळे संघाचा आत्मविश्वास आणखी वाढला असून, मेस्सीच्या नेतृत्वाखाली विश्वचषक जिंकण्याच्या आशा अधिक बळकट झाल्या आहेत.