India vs West Indies Live Streaming When and Where to Watch Match
भारत आणि वेस्ट इंडिज यांच्यात 2 कसोटी सामन्यांची मालिका खेळली जाणार असून, या मालिकेची सुरुवात उद्या, गुरुवारपासून (2 ऑक्टोबर) होणार आहे. वेस्ट इंडिजचा संघ सात वर्षांच्या प्रदीर्घ कालावधीनंतर कसोटी मालिका खेळण्यासाठी भारत दौऱ्यावर आला आहे.
नुकत्याच पार पडलेल्या आशिया चषक स्पर्धेच्या अंतिम सामन्यात भारताने दिमाखदार विजय मिळवून 9व्यांदा विजेतेपद पटकावले. आता भारतीय संघ मायदेशात वेस्ट इंडिजविरुद्ध दोन कसोटी सामन्यांची मालिका खेळण्यास सज्ज झाला आहे. ही मालिका जागतिक कसोटी अजिंक्यपद स्पर्धेच्या (World Test Championship) दृष्टिकोनातून भारतीय संघासाठी अत्यंत महत्त्वाची आहे. तसेच, कर्णधार म्हणून शुभमन गिलची घरच्या मैदानावरची ही पहिलीच कसोटी मालिका जिंकण्याचा मानस असेल.
भारतीय क्रिकेट संघ मायदेशात एका नव्या पर्वाची सुरुवात करण्यास सज्ज आहे. रोहित शर्मा आणि विराट कोहली यांसारख्या दिग्गजांच्या निवृत्तीनंतरची ही पहिलीच घरच्या मैदानावरची कसोटी मालिका आहे. वेस्ट इंडिजविरुद्धच्या दोन सामन्यांच्या मालिकेतील पहिला सामना गुरुवारपासून (2 ऑक्टोबर) नरेंद्र मोदी स्टेडियम, अहमदाबाद येथे खेळला जाईल.
हा सामना भारतीय प्रमाणवेळेनुसार सकाळी 9:30 वाजता सुरू होईल. त्यापूर्वी सकाळी 9:00 वाजता टॉस होईल. या मालिकेचे थेट प्रक्षेपण (Live Broadcast) स्टार स्पोर्ट्स नेटवर्कवर केले जाणार आहे. तसेच, जिओहॉटस्टार (JioHotstar) ॲप आणि संकेतस्थळावरही लाईव्ह स्ट्रीमिंग होणार आहे.
वेस्ट इंडिजचा संघ सात वर्षांनंतर भारतात कसोटी मालिका खेळण्यासाठी आला असल्याने ही मालिका खास आहे. यापूर्वी, 2018 मध्ये वेस्ट इंडिजने भारताचा दौरा केला होता, तेव्हा भारताने ही मालिका 2-0 अशी जिंकली होती.
दोन्ही संघांमध्ये आजवर 100 कसोटी खेळल्या गेल्या आहेत. यातील भारताने 23 सामने जिंकले असून वेस्ट इंडिजने 30 सामन्यांमध्ये विजय मिळवला आहे. 47 सामने अनिर्णीत राहिले आहेत.
100 पैकी 47 सामने भारतात खेळले गेले आहेत. ज्यातील 13 सामने भारताने जिंकले आहेत. तर वेस्ट इंडिजने 14 सामन्यांमध्ये विजय मिळवला आहे. 20 सामने अनिर्णीत राहिले आहेत.
भारतीय संघ : शुभमन गिल (कर्णधार), रवींद्र जडेजा (उपकर्णधार), यशस्वी जैस्वाल, केएल राहुल, साई सुदर्शन, देवदत्त पडिक्कल, ध्रुव जुरेल (यष्टीरक्षक), एन. जगदीशन (यष्टीरक्षक), नितीश रेड्डी, वॉशिंग्टन सुंदर, अक्षर पटेल, कुलदीप यादव, जसप्रीत बुमराह, मोहम्मद सिराज, प्रसिद्ध कृष्णा.
वेस्ट इंडिजचा संघ : रोस्टन चेस (कर्णधार), जोमेल वार्रिकन (उपकर्णधार), केवलन एंडरसन, एलिक अथानाजे, जॉन कॅम्पबेल, टेगेनारिन चंद्रपॉल, जस्टिन ग्रीव्स, शाई होप, टेविन इमलाच, जेडिया ब्लेड्स, जोहान लेने, ब्रँडन किंग, एंडरसन फिलिप, खारी पियरे, जेडन सील्स.