IND vs ZIM T20 World Cup 2026 Live Streaming: टी20 विश्वचषकाच्या सुपर-8 मध्ये आज भारतासमोर झिम्बाब्वेचे आव्हान आहे. सेमीफायनलच्या शर्यतीत टिकून राहण्यासाठी टीम इंडियासाठी हा सामना अक्षरशः ‘करो या मरो’ ठरणार आहे. अलीकडेच दक्षिण आफ्रिकेविरुद्ध 76 धावांनी झालेल्या पराभवानंतर भारतीय संघावर दबाव वाढला आहे.
सलग विजयांची मालिका तुटल्यानंतर आता पुनरागमनासाठी हा सामना निर्णायक मानला जात आहे. दुसरीकडे झिम्बाब्वेलाही वेस्ट इंडिजकडून मोठा पराभव पत्करावा लागला आहे. त्यामुळे दोन्ही संघांसाठी हा सामना केवळ गुणतालिकेसाठीच नव्हे, तर आत्मविश्वास परत मिळवण्यासाठीही महत्त्वाचा आहे.
भारत आणि झिम्बाब्वे यांच्यातील सुपर-8 सामना आज, 26 फेब्रुवारी रोजी, चेन्नईतील ऐतिहासिक एम ए चिदंबरम स्टेडियम येथे खेळला जाणार आहे. सामना भारतीय वेळेनुसार सायंकाळी 7 वाजता सुरू होईल, तर नाणेफेक 6:30 वाजता होईल. चेन्नईची खेळपट्टी पारंपरिकरीत्या फिरकीला साथ देणारी मानली जाते. त्यामुळे दोन्ही संघांच्या स्पिनर्सची भूमिका अत्यंत महत्त्वाची असणार आहे.
टीव्हीवर हा सामना स्टार स्पोर्ट्स नेटवर्कच्या विविध चॅनेल्सवर थेट प्रक्षेपित केला जाईल.
डिजिटल प्लॅटफॉर्मवर प्रेक्षकांना जिओहॉटस्टार अॅप आणि वेबसाइटवर लाईव्ह स्ट्रीमिंग पाहता येईल.
सूर्यकुमार यादवच्या नेतृत्वाखालील भारतीय संघाला या सामन्यात चांगली सुरुवात आवश्यक आहे. फलंदाजीत सातत्य, मधल्या फळीची जबाबदारी आणि गोलंदाजीत शिस्त या तीन गोष्टी निर्णायक ठरतील. जसप्रीत बुमराह आणि अर्शदीप सिंह यांच्यावर डेथ ओव्हर्समध्ये मोठी जबाबदारी असेल, तर फिरकीत कुलदीप यादव आणि अक्षर पटेल यांच्याकडून मोठ्या अपेक्षा आहेत.
सूर्यकुमार यादव (कर्णधार), ईशान किशन, अभिषेक शर्मा, तिलक वर्मा, हार्दिक पांड्या, शिवम दुबे, रिंकू सिंह, वॉशिंग्टन सुंदर, अर्शदीप सिंह, वरुण चक्रवर्ती, जसप्रीत बुमराह, संजू सॅमसन, मोहम्मद सिराज, कुलदीप यादव, अक्षर पटेल.
सिकंदर रजा (कर्णधार), ब्रायन बेनेट, तादिवानाशे मारुमानी, रयान बर्ल, ताशिंगा मुसेकिवा, टोनी मुन्योंगा, डियोन मायर्स, ब्रॅड इव्हान्स, ग्रेम क्रेमर, रिचर्ड नगरावा, ब्लेसिंग मुजाराबानी, वेलिंग्टन मसाकाद्झा, बेन करन, क्लाईव्ह मदांडे, टिनोटेंडा मापोसा.
या सामन्यात भारताने विजय मिळवला तर सेमीफायनला जाण्याची शक्यता आहे. मात्र पराभव झाल्यास स्पर्धेतील समीकरणे गुंतागुंतीची होऊ शकतात. त्यामुळे चेन्नईत आज रंगणारा हा सामना क्रिकेटप्रेमींसाठी अत्यंत महत्त्वाचा आहे.