वेलिंग्टन : भारताविरुद्ध रंगणाऱ्या आगामी एकदिवसीय (ODI) मालिकेसाठी रविवारी (दि. ११) न्यूझीलंडच्या क्रिकेट संघाची अधिकृत घोषणा करण्यात आली आहे. या मालिकेद्वारे आक्रमक सलामीवीर फिन ॲलन, भेदक वेगवान गोलंदाज लॉकी फर्ग्युसन आणि यष्टिरक्षक फलंदाज टिम सायफर्ट यांनी न्यूझीलंडच्या ५० षटकांच्या संघात दमदार पुनरागमन केले आहे. या अनुभवी खेळाडूंच्या समावेशामुळे किवी संघाची फलंदाजी आणि वेगवान मारा अधिक भक्कम झाला आहे.
दुखापतीवर यशस्वी मात करत युवा अष्टपैलू खेळाडू रचिन रवींद्रही एकदिवसीय सामन्यांसाठी मैदानात उतरण्यास सज्ज झाला आहे. गेल्या महिन्यात एका व्यावसायिक प्रोमो शूटदरम्यान रचिनच्या खांद्याला दुखापत झाली होती. या दुखापतीमुळे तो भारताविरुद्धच्या टी-२० मालिकेला मुकणार असला, तरी एकदिवसीय मालिकेसाठी तो पूर्णपणे तंदुरुस्त असल्याचे स्पष्ट झाले असून त्याच्या निवडीमुळे मधल्या फळीला बळकटी मिळणार आहे.
पाच सामन्यांच्या या मालिकेसाठी न्यूझीलंडच्या निवड समितीने एका विशेष रणनीतीचा अवलंब करत दोन वेगवेगळ्या संघांची निवड केली आहे. मालिकेतील तिसऱ्या सामन्यानंतर काही प्रमुख खेळाडू आगामी कसोटी मालिकेच्या पूर्वतयारीसाठी थेट वेलिंग्टनला रवाना होणार आहेत, जेथे पहिला कसोटी सामना खेळवला जाणार आहे. त्यामुळे उर्वरित खेळाडूंच्या जागी मालिकेतील शेवटच्या दोन एकदिवसीय सामन्यांसाठी सात नवीन खेळाडूंचा चमू संघात दाखल केला जाईल.
मर्यादित षटकांच्या क्रिकेटमधील कर्णधार मिचेल सँटनर या संपूर्ण मालिकेत संघाचे नेतृत्व सांभाळणार आहे. या संघात प्रामुख्याने त्या खेळाडूंना प्राधान्य देण्यात आले आहे, ज्यांनी जानेवारी महिन्यात भारतीय भूमीवर भारताचा २-१ असा पराभव केला होता. विशेष म्हणजे, फिन ॲलन आणि लॉकी फर्ग्युसन यांनी २०२३ च्या अखेरीस आपला शेवटचा एकदिवसीय सामना खेळला होता; त्यामुळे तब्बल तीन वर्षांच्या दीर्घ प्रतीक्षेनंतर हे दोन्ही मॅचविनर खेळाडू पुन्हा एकदा आंतरराष्ट्रीय एकदिवसीय मंचावर भारतासमोर आव्हान उभे करतील.
मालिकेतील पहिल्या तीन एकदिवसीय सामन्यांसाठी कर्णधार मिचेल सँटनरच्या नेतृत्वाखाली मायकेल ब्रेसवेल, मार्क चॅपमन, डेव्हॉन कॉनवे, जेकब डफी, मॅट हेन्री, काइल जेमिसन, यष्टिरक्षक टॉम लॅथम, डॅरिल मिचेल, ग्लेन फिलिप्स, रचिन रवींद्र, नाथन स्मिथ, विल यंग आणि ब्लेअर टिकनर यांचा समावेश करण्यात आला आहे. तर कसोटीच्या तयारीसाठी वरिष्ठ खेळाडू बाहेर पडल्यानंतर, शेवटच्या दोन सामन्यांसाठी फिन ॲलन, क्रिस्टियन क्लार्क, मॅट फिशर, लॉकी फर्ग्युसन, यष्टिरक्षक मिच हे, निक केली आणि टिम सायफर्ट उर्वरित चमूसह मैदानावर उतरतील.