Bhuvneshwar Kumar T20I Comeback Record : भारतीय क्रिकेट संघात निवड होणे हा एक बहुमानच. साहजिकच ही निवड गुणवंत क्रिकेटपटूंचीच होते. मात्र यानंतर संघात आपलं स्‍थान टिकवणे ही कठीण बाब आहे. मात्र महाकठीण बाब म्हणजे खराब कामगिरीमुळे संघातून पत्ता कट झाल्‍यानंतर पुन्‍हा कमबॅक करणे. आता हे महाकठीण आव्‍हान टीम इंडियाचा वेगवान गोलंदाज भुवनेश्वर कुमार याने पेललं. त्याने आयपीएलमध्‍ये उत्‍कृष्‍ट कामगिरी करत स्‍वतःला सिद्‍ध केले. निवड समितीला त्‍याच्‍या कामगिरीची दखल घेणे भाग पडलं. आता सुमारे चार वर्षांनंतर त्‍याचा भारताच्या टी-२० संघात समावेश झाला आहे. शनिवारी बेंगळुरू येथे वेस्ट इंडिजविरुद्धच्या पाचव्या आणि शेवटच्या टी-२० सामन्यात त्याने भारतीय टी-२० संघात पुनरागमन केले. यामुळे आता एक अनोखा विक्रम त्‍याच्‍या नावावर झाला आहे.
शनिवारी बेंगळुरू येथे वेस्ट इंडिजविरुद्धच्या पाचव्या आणि अंतिम टी-२० सामन्यात भुवनेश्वर भारताच्या अंतिम ११ खेळाडूंमध्ये (प्लेइंग इलेव्हन) सामील होता. पावसामुळे हा सामना ९-९ षटकांचा झाला, मात्र खराब हवामानामुळे अखेर सामना रद्द करावा लागला. छत्तीस वर्षीय 'भुवनेश्वर'ला बेंगळुरूमध्ये गोलंदाजीची संधी मिळाली नाही. आता तो २२ ऑक्टोबरपासून सुरू होणाऱ्या न्यूझीलंड दौऱ्यावरील टी-२० मालिकेत खेळताना दिसणार आहे.
सर्वाधिक टी-२० आंतरराष्ट्रीय सामन्यांच्या अंतरानंतर (गॅप) पुनरागमन करणारा भुवनेश्वर कुमार हा पहिला भारतीय क्रिकेटपटू ठरला आहे. त्याने तब्बल १०६ सामन्यांच्या मध्यानंतर संघात पुनरागमन केले आहे. भुवनेश्वर कुमार यापूर्वी नोव्हेंबर २०२२ मध्ये भारतासाठी शेवटचा टी-२० सामना खेळला होता. म्हणजेच, तब्बल ३ वर्षे आणि ३४० दिवसांनंतर त्याने संघात आपले स्‍थान निर्माण केले. यापूर्वी टी-२० क्रिकेटमध्ये भारताकडून सर्वाधिक काळानंतर पुनरागमन करण्याचा विक्रम वेगवान गोलंदाज खलील अहमदच्या नावावर होता. खलीलने १०४ सामन्यांच्या मध्यानंतर पुनरागमन केले होते. त्याच्यानंतर भारताच्या यादीत वरुण चक्रवर्ती (८६ सामने) तिसऱ्या, संजू सॅमसन (७३ सामने) चौथ्या आणि शिवम दुबे (७० सामने) पाचव्या स्थानावर आहेत.
१०६ सामने - भुवनेश्वर कुमार (नोव्हेंबर २०२२ - ऑक्टोबर २०२६) - (३ वर्षे आणि ३४० दिवस)
१०४ सामने - खलील अहमद (नोव्हेंबर २०१९ - जुलै २०२४) - (४ वर्षे आणि २७३ दिवस)
८६ सामने - वरुण चक्रवर्ती (नोव्हेंबर २०२१ - ऑक्टोबर २०२४) - (२ वर्षे आणि ३३४ दिवस)
७३ सामने - संजू सॅमसन (जुलै २०१५ - जानेवारी २०२०) - (४ वर्षे आणि १७३ दिवस)
७० सामने - शिवम दुबे (फेब्रुवारी २०२० - ऑगस्ट २०२३) - (३ वर्षे आणि १९५ दिवस)
विशेष म्हणजे, दिवसांच्या बाबतीत सर्वाधिक दीर्घ अंतरानंतर सामना खेळण्याचा विक्रम दिनेश कार्तिकच्या नावावर आहे. त्याने तब्बल ७ वर्षे आणि ५७ दिवसांच्या अंतराने टी-२० सामना खेळला होता. त्याने मे २०१० नंतर थेट जुलै २०१७ मध्ये भारताचे प्रतिनिधित्व केले होते. या काळात तो तब्बल ५६ सामने संघाबाहेर राहिला.