पाकिस्तान आणि बांगलादेश यांच्यात सध्या तीन सामन्यांची टी-20 मालिका खेळवली जात आहे. मालिकेतील पहिला सामना शेरे बांगला नॅशनल स्टेडियमवर खेळवला गेला. या सामन्यात बांगलादेशचा वेगवान गोलंदाज मुस्तफिजुर रहमानने एक ऐतिहासिक कामगिरी केली आहे. तो आता टी-20 आंतरराष्ट्रीय सामन्यात चार षटकांच्या स्पेलमध्ये बांगलादेशकडून सर्वात कमी धावा देणारा गोलंदाज ठरला आहे. पाकिस्तानविरुद्धच्या या सामन्यात त्याने चार षटकांत केवळ 6 धावा देत दोन महत्त्वपूर्ण बळी मिळवले.
यापूर्वी, बांगलादेशकडून टी-20 आंतरराष्ट्रीय सामन्यात सर्वात कमी धावा देण्याचा विक्रम रिशाद होसेन, तंजीम हसन साकिब आणि स्वतः मुस्तफिजुर रहमान यांच्या नावावर संयुक्तपणे होता. या तिन्ही गोलंदाजांनी एका टी-20 सामन्यात 4 षटकांच्या स्पेलमध्ये 7 धावा खर्च केल्या होत्या. आता या कामगिरीमुळे रहमान भारताचा वेगवान गोलंदाज जसप्रीत बुमराहच्याही पुढे गेला आहे.
बुमराहने 2024 मध्ये अफगाणिस्तानविरुद्धच्या एका टी-20 आंतरराष्ट्रीय सामन्यात चार षटकांत 7 धावा देत 3 बळी मिळवले होते. भारताकडून टी-20 आंतरराष्ट्रीय सामन्यात सर्वात कमी धावा देण्याचा विक्रम भुवनेश्वर कुमारच्या नावावर आहे. त्याने 2022 मध्ये अफगाणिस्तानविरुद्धच्या सामन्यात 4 षटकांत केवळ 4 धावा देत 5 बळी मिळवले होते.
या सामन्यात बांगलादेश संघाने आणखी एक मोठा विक्रम आपल्या नावे केला आहे. त्यांनी पाकिस्तानच्या संघाला टी-20 आंतरराष्ट्रीय सामन्यात प्रथमच सर्वबाद केले आहे. यापूर्वी टी-20 आंतरराष्ट्रीय क्रिकेटमध्ये असे कधीही घडले नव्हते. या सामन्यात पाकिस्तानचा संघ 110 धावांवर सर्वबाद झाला.
या सामन्यात टॉस गमावून प्रथम फलंदाजीसाठी उतरलेल्या पाकिस्तानची सुरुवात अत्यंत निराशाजनक झाली. दुसऱ्याच षटकात संघाला पहिला धक्का बसला. त्यानंतर संघाने नियमित अंतराने गडी गमावले आणि अवघ्या 46 धावांवर पाकिस्तानचा अर्धा संघ तंबूत परतला होता. बाद झालेल्या पाच फलंदाजांपैकी एकालाही दुहेरी धावसंख्या गाठता आली नाही. सलामीवीर फखर जमान 12व्या षटकात धावबाद झाल्यावर पाकिस्तानला मोठा धक्का बसला. या सामन्यात पाकिस्तानचे केवळ तीनच फलंदाज दुहेरी धावसंख्या गाठण्यात यशस्वी ठरले. फखर जमानने 34 चेंडूंत 44 धावा करत संघाकडून सर्वाधिक धावा केल्या. त्याच्याव्यतिरिक्त खुशदिल शाहने 18 आणि अब्बास आफ्रिदीने 22 धावांचे योगदान दिले. बांगलादेशच्या गोलंदाजीबद्दल बोलायचे झाल्यास, तस्किन अहमदने 3.3 षटकांत 22 धावा देत 3 बळी घेतले.