मेलबर्न : ऐतिहासिक मेलबर्न क्रिकेट मैदानावर (MCG) सुरू असलेल्या 'बॉक्सिंग डे' ॲशेस कसोटीचा पहिला दिवस क्रिकेट इतिहासात सुवर्ण अक्षरांनी लिहिला गेला आहे. वेगवान गोलंदाजीला पोषक खेळपट्टी आणि प्रेक्षकांचा अभूतपूर्व उत्साह यांच्या साक्षीने पहिल्याच दिवशी चक्क २० गडी बाद झाले. फलंदाजांसाठी 'काळ' ठरलेल्या गोलंदाजांनी अक्षरशः तांडव केले असून, पहिल्या डावाच्या अखेरीस यजमान ऑस्ट्रेलियाने इंग्लंडवर निसटती पण महत्त्वाची आघाडी मिळवली आहे.
खेळपट्टीवर असलेल्या १० मिमी गवताचा फायदा घेण्यासाठी इंग्लंडचा कर्णधार बेन स्टोक्सने नाणेफेक जिंकून प्रथम गोलंदाजीचा धाडसी निर्णय घेतला. त्याचा हा निर्णय जोश टंगने सार्थ ठरवला. टंगने कांगारूंच्या फलंदाजीला खिंडार पाडत ५ बळी टिपले आणि ऑस्ट्रेलियाचा पहिला डाव अवघ्या १५२ धावांत गुंडाळला. ऑस्ट्रेलियाकडून मायकल नेसरने सर्वाधिक ३५ धावांची झुंजार खेळी केली.
ऑस्ट्रेलियाला १५२ धावांत रोखल्यानंतर इंग्लंडला त्यांच्या पहिल्या डावात मोठी धावसंख्या उभारण्याची संधी होती. मात्र, इंग्लिश फलंदाजांनी पुन्हा एकदा अत्यंत बेजबाबदार खेळ केला. पहिल्या चेंडूपासून विनाकारण आक्रमकता दाखवण्याच्या नादात इंग्लंडची अवस्था ४ बाद १६ अशी दयनीय झाली. जो रूट (०), बेन डकेट (२), जॅकब बेथेल (१) आणि जॅक क्रॉली (५) हे स्वस्तात माघारी परतले.
हॅरी ब्रूकने ४१ आणि गस ॲटकिन्सनने २८ धावा केल्यामुळे इंग्लंडने कसेबसे शंभरचा टप्पा ओलांडला. पूर्ण संघ अवघ्या ११० धावांवर तंबूत परतला. ऑस्ट्रेलियाच्या मायकल नेसरने फलंदाजीनंतर गोलंदाजीतही चमक दाखवत ४ बळी घेतले, तर स्कॉट बोलँडने ३ गडी बाद केले.
या सामन्याने मैदानाबाहेरही इतिहास रचला आहे. शुक्रवारी सामन्याच्या पहिल्या दिवशी तब्बल ९४,१९९ चाहत्यांनी स्टेडियममध्ये उपस्थिती लावली. हा आकडा क्रिकेटच्या इतिहासात एका दिवसात सर्वाधिक प्रेक्षक उपस्थित राहण्याचा नवा जागतिक विक्रम ठरला आहे. यापूर्वी २०१५ च्या विश्वचषक अंतिम सामन्याचा (९३,०१३) विक्रम आज मोडीत निघाला. कसोटी क्रिकेटच्या इतिहासातील ही आजवरची सर्वाधिक प्रेक्षक उपस्थिती ठरली आहे.
पहिल्या दिवसाचा खेळ संपायला एक षटक शिल्लक असताना ऑस्ट्रेलियाने स्कॉट बोलँडला 'नाईटवॉचमन' म्हणून मैदानावर पाठवले. बोलँडने केवळ ते षटक खेळून काढले नाही, तर दिवसाच्या शेवटच्या चेंडूवर दिमाखदार चौकार ठोकून ऑस्ट्रेलियाची एकूण आघाडी ४६ धावांवर नेली.
दिवसभराच्या खेळानंतर मायकल नेसर म्हणाला, ‘चेंडू खेळपट्टीवर उसळी घेत वळत होता. अशा स्थितीत अचूक टप्प्यावर मारा करणे महत्त्वाचे होते. हे यश म्हणजे एखाद्या स्वप्नासारखे आहे. फलंदाजी करतानाही आम्ही गोलंदाजांवर दडपण आणण्याचा प्रयत्न केला. कसोटीत बचाव आणि आक्रमण यांचा समतोल राखणे हीच खरी कसरत असते.’