sanjay dutt breaks silence possessing prohibited weapons during 1993 mumbai blasts still regrets says my mistake
पुढारी ऑनलाईन : अभिनेता संजय दत्तने शेखर सुमन यांच्या शोमध्ये आपल्या आयुष्यातील सर्वात मोठ्या वादावर भाष्य केले. १९९३ मधील मुंबई बॉम्बस्फोट, शस्त्र बाळगल्याचे प्रकरण आणि अटकेबाबत बोलताना त्याने वडील सुनील दत्त यांच्या प्रतिक्रियेची आठवण सांगितली. तसेच या संपूर्ण प्रकरणाबद्दल खंत व्यक्त केली.
संजय दत्त हा हिंदी चित्रपटसृष्टीतील अशा कलाकारांपैकी एक आहे, जो आपल्या कारकिर्दीसोबतच वैयक्तिक आयुष्यामुळेही नेहमी चर्चेत राहिला आहे. अमली पदार्थांच्या व्यसनाशी संघर्ष करण्यापासून ते तुरुंगात जाण्यापर्यंत संजय दत्तने आपल्या आयुष्यात अनेक कठीण प्रसंग अनुभवले आहेत. त्याच्या आयुष्यातील सर्वात कठीण आणि वादग्रस्त काळाबद्दल बोलायचे झाल्यास, १९९३ च्या मुंबई बॉम्बस्फोटानंतर त्याचे आयुष्य पूर्णपणे उद्ध्वस्त झाले होते. त्याच्यावर बेकायदेशीर शस्त्र बाळगल्याचा आरोप करण्यात आला होता. त्यानंतर शस्त्रास्त्र कायद्यांतर्गत (आर्म्स ॲक्ट) त्याला दोषी ठरवण्यात आले आणि तुरुंगातही जावे लागले होते.
आता संजय दत्तने शेखर सुमन यांच्या 'शेखर टुनाइट' या शोमध्ये संवाद साधताना या संपूर्ण वादावर मोकळेपणाने भाष्य केले. या प्रकरणाबद्दल पश्चात्ताप व्यक्त करत त्याने माफीही मागितली आहे.
अंतर्मनाच्या आवाजाकडे दुर्लक्ष केले - संजय दत्त
मुंबईत झालेल्या साखळी बॉम्बस्फोटांनंतर करण्यात आलेल्या तपासादरम्यान एप्रिल १९९३ मध्ये संजय दत्तला प्रतिबंधित शस्त्रे (ज्यामध्ये एके-५६ रायफलचाही समावेश होता) बेकायदेशीरपणे बाळगल्याच्या आरोपाखाली अटक करण्यात आली होती.
शोमध्ये बोलताना संजय दत्तने सांगितले की, शस्त्रे स्वतःकडे ठेवण्यास होकार देण्यापूर्वीच काहीतरी चुकीचे घडत असल्याची जाणीव त्याला झाली होती. मात्र, ही शस्त्रे केवळ काही दिवसच आपल्याकडे ठेवायची आहेत आणि त्यामुळे कोणतीही अडचण येणार नाही, असा विचार करून त्याने आपल्या अंतर्मनाच्या आवाजाकडे दुर्लक्ष केले.
'चूक माझीच होती' - संजय दत्त
संजय दत्त म्हणाला, "चूक माझीच होती. जर तुमचे मन तुम्हाला काही सांगत असेल, तर तुम्ही त्याचा आवाज ऐकला पाहिजे. पण जर तुमचा मेंदू तुम्हाला काही सांगत असेल, तर त्याचे म्हणणे इतक्या लवकर ऐकू नये. जेव्हा मी ती घटना पाहिली, तेव्हा माझे मन मला सांगत होते की, मी हे करू नये. मात्र, माझा मेंदू सांगत होता की, एक आठवडा ठेवून घे, त्यात काय नुकसान होणार आहे? पण माझ्या या निर्णयाचे परिणाम इतके गंभीर होऊ शकतात, याची मला अजिबात कल्पना नव्हती. आपण ज्या देशात राहतो, त्या देशातील कायद्यांची माहिती आपल्याला नक्कीच असली पाहिजे. ती वस्तू स्वतःकडे ठेवताना मला संकोच वाटत होता."
संजय दत्तच्या अटकेवेळी रडू लागले होते वडील सुनील दत्त
यावेळी संजय दत्त यांनी त्या भावनिक क्षणाबद्दलही सांगितले, जेव्हा त्यांचे वडील सुनील दत्त रडू लागले होते. त्यांनी सांगितले की, पोलीस त्यांना हातकड्या घालत होते, तेव्हा त्यांचे वडील सुनील दत्त रडत होते. आपल्या मुलासोबत अशा प्रकारचे वर्तन होत असल्याचे पाहून त्यांना खूप वाईट वाटत होते.
मात्र, संजय दत्त यांनी वडिलांना सावरले आणि ही केवळ एक कायदेशीर प्रक्रिया आहे, त्यामुळे त्यांनी काळजी करू नये, असा विश्वास दिला. पण आपल्या वडिलांना अशा प्रकारे खचलेले पाहून संजय दत्त स्वतःही आतून खचला होता. तरीही वडिलांना धीर देता यावा, यासाठी त्याला बाहेरून स्वतःला खंबीर दाखवावे लागले होते.
संजय दत्तच्या 'या' वक्तव्यावरून निर्माण झाला होता वाद
अलीकडेच याच शोमध्ये केलेल्या एका वक्तव्यामुळे संजय दत्त वादात सापडला होता. त्यानंतर त्याला या संपूर्ण प्रकरणावर स्पष्टीकरण द्यावे लागले होते. शोदरम्यान एक टास्क पूर्ण करताना संजय दत्तने म्हटले होते की, आता भारतात त्याला पूर्वीसारखी शांतता जाणवत नाही. या वक्तव्यानंतर संजय दत्त सोशल मीडियावरील ट्रोलर्सच्या निशाण्यावर आले होते. त्यानंतर त्यांनी एक निवेदन जारी करत स्पष्टीकरण दिले की, शोमध्ये त्याने जे काही म्हटले होते, तो केवळ त्यांच्या सादरीकरणाचा एक भाग होता.