bollywood sadhguru questions alia bhatts 9 hour sleep routine asks then when will you actually lives
पुढारी ऑनलाईन :
चेन्नईमध्ये झालेल्या संवादात आलिया भट्ट आणि सद्गुरु जग्गी वासुदेव यांच्यात ‘झोप’ आणि ‘विश्रांती’ याबद्दल एक सूक्ष्म दृष्टिकोन समोर आला. आलियाने सांगितले की ती दररोज ८–९ तास झोपते, हे ऐकून सद्गुरु आश्चर्यचकित झाले. त्यांनी विचारले – “हा तर दिवसाचा चौथा भाग आहे, मग तुम्ही जगणार कधी?”
आपल्यापैकी अनेकांना झोप खूप आवडते. असंच काहीसं आलिया भट्टनेही मान्य केलं. सद्गुरुंच्या YouTube चॅनलवरील या चर्चेत आलियाने सांगितले की, तिला चांगली, भरपूर झोप खूप आवडते. मात्र या विषयावर झालेली पुढची चर्चा आयुष्याबद्दल वेगळाच दृष्टिकोन देणारी ठरली.
संवादादरम्यान आलियाने सांगितले की, ती साधारणपणे रोज ८–९ तास झोपते. त्यावर सद्गुरु म्हणाले, “हा तर दिवसाचा चौथा भाग आहे. मग तुम्ही जगणार कधी?” हा प्रश्न ऐकून आलियाही थोडी चकित झाली.
सद्गुरु यांनी आपला दिनक्रम सांगताना म्हटले की, ते फक्त ४–५ तास झोपतात. “झोप कमी करण्याचा अर्थ म्हणजे जीवन जगण्यासाठी अधिक वेळ मिळवणे,” असे ते म्हणाले. मात्र आलियाचे मत अनेकांसारखेच होते. तिच्या मते, झोप शरीराला पुनरुज्जीवित करण्यासाठी अत्यंत गरजेची असते.
आलिया म्हणाली, “मला झोप खूप आवडते. ८ तास झोपल्यानंतरही कधी कधी मला अजून विश्रांती घ्यावीशी वाटते आणि खरं सांगायचं तर, त्यात मजाही येते.”
यावर सद्गुरु यांनी झोप आणि ताण (stress) यातील संबंध स्पष्ट केला. ते म्हणाले, “आपण दिवसभर स्वतःला इतक्या ताणात का ठेवतो, की नंतर तो कमी करण्यासाठी मार्ग शोधावे लागतात?”
यानंतर त्यांनी एक महत्त्वाची गोष्ट सांगितली – “खरं तर कुणालाही झोप आवडत नाही, कारण गाढ झोपेत आपल्याला स्वतःचं भानही राहत नाही. आपण ज्याचा आनंद घेतो, ते म्हणजे झोपेमुळे मिळणारी विश्रांती.”
या चर्चेत आलियाची मुलगी राहा हिचाही उल्लेख झाला. सद्गुरुंनी राहाला ‘अधिक आनंदी’ असल्याचे सांगितले आणि आलियाला सल्ला दिला की कधी कधी मुलांकडूनही शिकायला हवे. “नेहमी शिकवण्याऐवजी कधी ऐका, पाहा आणि समजा. मूल जीवनाच्या अधिक जवळ असते,” असे ते म्हणाले. रणबीर कपूर आणि आलिया भट्ट यांचे एप्रिल २०२२ मध्ये लग्न झाले. त्याच वर्षी नोव्हेंबरमध्ये त्यांच्या घरी मुलगी राहाचा जन्म झाला.