पुणे; पुढारी वृत्तसेवा : प्रवाशांची मोठी मागणी असलेल्या पुणे-बेळगाव विमानसेवा येत्या ऑक्टोबरपासून सुरू करण्यात येणार आहे. यासंदर्भातील घोषणा खासदार इरान्ना कडाडी यांनी केली आहे. त्याबाबतची माहिती हवाई वाहतूक अभ्यासक धैर्यशील वंडेकर यांनी दिली. जवळ-जवळ वर्षभरापासून या मार्गावरील उड्डाण बंद झाल्यानंतर ते पुन्हा सुरू व्हावे, यासाठी बेळगावच्या लोकप्रतिनिधींबरोबरच वंडेकर यांनीदेखील केंद्रीय नागरी हवाई मंत्र्यांकडे पाठपुरावा केला होता.
पूर्वी 'उडान' योजनेंतर्गत चालवण्यात येत असलेल्या बेळगाव-पुणे उड्डाणास उद्योजक, व्यावसायिक, आयटी क्षेत्र, विद्यार्थी, पर्यटक इत्यादींकडून मोठा प्रतिसाद मिळत होता. हे उड्डाण बंद झाल्यानंतर दोन्हीही शहरांतून यासाठी सतत मागणी होत होती. ही फ्लाईट बंद असल्यामुळे सध्या प्रवाशांना बेळगावला विमानाने जाण्यासाठी मोठी गैरसोय होत होती. बरेच जण पुणे-हुबळी फ्लाईटने हुबळीला जाऊन तेथून गाडीने बेळगावला जायचे. यामुळे पैसे आणि वेळेचा अपव्य होत होता. बेळगावहून पुणे उड्डाण ऑक्टोबरमध्ये सुरू होत असल्यामुळे पुणे-बेळगाव व परिसरातील अर्थचक्रास मोठी गती मिळणार आहे.
1) इंडिगो एअरलाइन्सचे उड्डाण आठवड्यातून तीन दिवस : मंगळवार, गुरुवार, शनिवार (दिनांक 31 ऑक्टोबरपासून)
2) स्टार एअरलाइन्सचे उड्डाण 29 ऑक्टोबरपासून दररोज
पुणे-बेळगाव विमानसेवा सुरू करण्याच्या मागणीची पूर्तता केल्याबद्दल केंद्रीय नागरी हवाई वाहतूकमंत्र्यांचे आभार मानतानाच गेल्या वर्षभरापासून बंद असलेली पुणे-नाशिक विमानसेवा देखील लवकर सुरू करण्यात यावी, या मागणीचा मी पुनरुच्चार करतो.
– धैर्यशील वंडेकर, हवाई वाहतूकतज्ज्ञ
हेही वाचा