रेश्मा फडतरे
तळेगाव दाभाडे: जिजामाता चौक येथील श्री तुळजाभवानी मंदिरातील चांदीचा मुकुट पुन्हा एकदा चोरीला गेल्याची खळबळजनक घटना घडली आहे.
पोलीस पथकाने अथक परिश्रम करून २३ मे रोजी चोरीस गेलेला मुकुट हस्तगत करून आरोपींना जेरबंद केले होते. शुक्रवार (दिनांक १२) रोजी मंदिर व्यवस्थापक व ग्रामस्थांच्या उपस्थितीत पोलीस उप आयुक्त परिमंडळ 4 श्वेता खेडकर व वरिष्ठ पोलीस निरीक्षक तळेगाव दाभाडे कन्हैया थोरात यांच्या हस्ते हा मुकुट देवीला परिधान केला होता.
परंतु त्याच रात्री अज्ञात चोरट्याने गाभाऱ्याचा दरवाजा तोडून तो मुकुट पुन्हा चोरी केला आहे. सदर घटनेची माहिती मिळताच तळेगाव दाभाडे पोलीस पथकाने घटनेचे सीसीटीव्ही फुटेज हस्तगत करून चोराचा शोध घेण्यास सुरुवात केली आहे.
तर दुसऱ्या घटनेत इंदोरी येथील श्री कडजाई माता मंदिरात शुक्रवार (दिनांक १२) रात्री सव्वा अकरा वाजण्याच्या सुमारास तीन चोरट्यांनी घुसून गाभाऱ्यातील दानपेटी फोडून रोकड लंपास केली आहे. तळेगाव एमआयडीसी पोलीस घटनेच्या सीसीटीव्ही फुटेज वरून चोरांचा माग काढत आहेत. एकाच रात्री घडलेल्या या दोन घटनांमुळे आता देवही सुरक्षित नाहीत ही भावना नागरिकांमध्ये निर्माण झाली आहे.
सदर दोनही चोरीच्या घटनांचा पोलीस प्रशासनाकडून कसून तपास सुरू आहे. तशा सूचना संबंधित पोलीस पथकांना देण्यात आल्या आहेत. तांत्रिक विश्लेषणाद्वारे लवकरच आम्ही या दोन्ही चोरीच्या घटनांचा छडा लावू.श्वेता खेडकर पोलीस उपायुक्त परिमंडळ 4