पिंपरी: हनी ट्रॅप आणि लैंगिक अत्याचार प्रकरणांमुळे सतत चर्चेत असलेला प्रफुल्ल रायचंद लोढा अखेर बावधन पोलिसांच्या ताब्यात आला आहे. बावधन पोलिस ठाण्यात दाखल झालेल्या बलात्कार प्रकरणात पिंपरी-चिंचवड पोलिसांनी गुरुवारी (दि. 22) सकाळी ऑर्थर रोड कारागृहातून लोढाला ताब्यात घेतले.
याबाबत सविस्तर वृत्त असे की, बावधन पोलिस ठाण्यात 17 जुलै रोजी 36 वर्षीय महिलेने दिलेल्या फिर्यादीनुसार, प्रफुल्ल लोढा याच्यावर बलात्काराचा गुन्हा दाखल करण्यात आला आहे. तुमच्या पतीला नोकरी लावतो, या आमिषाने 27 मे रोजी बालेवाडीतील हॉटेलमध्ये बोलावून महिलेला शारीरिक संबंधांची सक्ती केल्याचा आरोप फिर्यादेत करण्यात आला आहे. या गंभीर आरोपांवरून पोलिसांनी गुन्हा दाखल करून चौकशी सुरू केली होती. (Latest Pune News)
लोढावर यापूर्वीही मुंबईतील अंधेरी एमआयडीसी आणि साकीनाका पोलिस ठाण्यात अल्पवयीन मुलींवर अत्याचार, अश्लील छायाचित्रण, डांबून ठेवणे आणि धमकावणे यासह गंभीर गुन्हे दाखल आहेत. 5 जुलै रोजी साकीनाका पोलिसांनी त्याला अटक केली होती. त्यानंतर 14 जुलै रोजी अंधेरी एमआयडीसी पोलिस ठाण्यात पोक्सो, बलात्कार आणि हनी ट्रॅपचा गुन्हा नोंदवण्यात आला.
राजकारणातही या प्रकरणामुळे खळबळ उडाली आहे. राष्ट्रवादी काँग्रेसचे ज्येष्ठ नेते एकनाथ खडसे यांनी 20 जुलै रोजी लोढा हा भाजपचे मंत्री गिरीश महाजन यांचा निकटवर्तीय असल्याचा आरोप केला होता. या विधानामुळे राज्यात मोठा राजकीय वादंग निर्माण झाला होता.बावधन पोलिसांनी आता लोढाचा ताबा घेतल्यामुळे चौकशीत आणखी धक्कादायक माहिती समोर येण्याची शक्यता व्यक्त होत आहे.
25 ऑगस्टपर्यंत कोठडी
बावधन पोलिसांनी प्रफुल्ल लोढा याला ताब्यात घेऊन न्यायालयात हजर केले. यावेळी न्यायालयाने लोढा याला 25 ऑगस्टपर्यंत पोलीस कोठडी सुनावली आहे.