पिंपरी: पिंपरी-चिंचवड शहरात पुन्हा एकदा लॉरेन्स बिष्णोई गँगचे नाव समोर आल्याने खळबळ उडाली आहे. शहरातील एजे फर्निचर मॉलवर दुचाकीवरून आलेल्या दोन अज्ञातांनी गोळीबार करत दहशत निर्माण केली. या घटनेनंतर सोशल मीडियावरून थेट जीवे मारण्याची धमकी देणारी पोस्ट व्हायरल झाल्याने व्यापारी वर्गात भीतीचे वातावरण निर्माण झाले आहे.
पोलिसांनी दिलेल्या माहितीनुसार, दोन अज्ञात तरुण दुचाकीवरून एजे फर्निचर मॉलसमोर आले. त्यांनी मॉलच्या दिशेने गोळ्या झाडत परिसरात दहशत पसरवली. अचानक झालेल्या गोळीबारामुळे नागरिकांमध्ये एकच गोंधळ उडाला. घटना घडल्यानंतर आरोपी काही क्षणांतच पसार झाले.
दरम्यान, या गोळीबाराची जबाबदारी लॉरेन्स बिष्णोई गँगशी संबंधित असल्याचा दावा करणाऱ्या शुभम लोणकर याने सोशल मीडियावरील पोस्टद्वारे स्वीकारल्याचे समोर आले आहे. संबंधित पोस्टमध्ये मॉल मालक अशोक नयन यांच्यावर एमडी ड्रग्स आणि हवाला व्यवहाराचे आरोप करण्यात आले आहेत. तसेच “हा फक्त ट्रेलर आहे, पुढची गोळी थेट डोक्यात घालू,” अशी धमकीही देण्यात आली आहे.
पोस्टमध्ये ‘वीर फर्निचर’शी संबंधित मुकेश सहराना यांचाही उल्लेख करण्यात आला असून त्यांनाही जीवे मारण्याची धमकी देण्यात आली आहे. त्यामुळे व्यापारी वर्गात प्रचंड भीतीचे वातावरण निर्माण झाले आहे. घटनेची माहिती मिळताच पिंपरी-चिंचवड पोलिसांनी घटनास्थळी धाव घेत तपास सुरू केला. फॉरेन्सिक पथकालाही पाचारण करून घटनास्थळावरून पुरावे गोळा करण्यात आले आहेत.
सीसीटीव्ही फुटेजच्या आधारे पोलिसांकडून गोळीबार करणाऱ्या दोघांचा शोध सुरू आहे. तसेच, सोशल मीडियावर व्हायरल झालेल्या पोस्टची सत्यता आणि त्यामागील कनेक्शन याचाही तपास केला जात आहे. गोळीबारामागे खंडणी, गँगवॉर किंवा अन्य कोणते रॅकेट कार्यरत आहे का, याचा तपास पोलिसांकडून सुरू आहे. मात्र सोशल मीडियावरून खुलेआम देण्यात आलेल्या धमक्यांमुळे शहरातील कायदा व सुव्यवस्थेचा प्रश्न पुन्हा ऐरणीवर आला आहे.