पिंपरी: पिकअप गाडीच्या चालकाने निष्काळजीपणे गाडी चालवल्यामुळे झालेल्या अपघातात दहा महिलांचा मृत्यू झाला. ही घटना सोमवारी (दि. 11) दुपारी साडेबाराच्या सुमारास पापळवाडी ते कुंडेश्वर महादेव मंदिर डोंगराच्या पायथ्यालगत घडली. याप्रकरणी पिकअप टेम्पोचालकाला अटक करण्यात आली आहे.
पिकअप चालक ऋषिकेश रामदास करंडे (25, रा. पापळवाडी, पाईट, ता. खेड) याला अटक करण्यात आली आहे. याप्रकरणी सिध्दिका रामदास चोरघे (21, रा. पापळवाडी, पाईट, ता. खेड) यांनी महाळुंगे एमआयडीसी पोलिस ठाण्यात फिर्याद दिली आहे. शारदा रामदास चोरघे (40), शोभा ज्ञानेश्वर पापळ (45), सुमन काळुराम पापळ (47), मंदा कानिफ दरेकर (55), संजीवनी ऊर्फ संजाबाई कैलास दरेकर (50), मीराबाई संभाजी चोरघे (50), बायडाबाई ज्ञानेश्वर दरेकर (65), शकुंतला ऊर्फ सखुबाई तानाजी चोरघे (55), पार्वताबाई दत्तू पापळ (55) आणि फसाबाई प्रभू सावंत (55) यांचा समावेश आहे. (Latest Pimpri News)
पोलिसांनी दिलेल्या माहितीनुसार, आरोपी ऋषिकेश करंडे याच्याकडे माल वाहतुकीचा परवाना होता. मात्र, त्याने पिकअप गाडीत महिला आणि लहान मुलांना दाटीवाटीने बसवले. तो गाडी घेऊन पापळवाडीहून श्रीक्षेत्र कुंडेश्वर महादेव मंदिराकडे जात असताना, तीव्र चढ आणि वळणांच्या घाटात डोंगराच्या पायथ्याशी गाडीवरील नियंत्रण सुटले.
गाडी मागे घसरून रस्त्याच्या कडेला असलेल्या 25 ते 30 फूट खोल दरीत कोसळली. या अपघातात 10 महिलांचा मृत्यू झाला असून, काही महिला आणि मुले गंभीर तर काही किरकोळ जखमी झाले आहेत. महाळुंगे एमआयडीसी पोलिस तपास करीत आहेत.