Court security breach : ओडिशाच्या नबरंगपूर न्यायक्षेत्रांतर्गत येणाऱ्या झरीगाव येथील प्रथम श्रेणी न्यायदंडाधिकारी (JMFC) न्यायालयाच्या आवारात एका महिला पक्षकाराने महिला न्यायमूर्ती, सहायक सरकारी वकील (APP) आणि कोर्ट सब-इन्स्पेक्टर (CSI) यांच्यावर लोखंडी रॉडने अचानक आणि निर्दयीपणे हल्ला केल्याची एक खळबळजनक घटना शनिवारी (७ नोव्हेंबर) घडली.
'सनामती माझी' ही महिला न्यायालयात कामकाजाची वेळ सुरू असताना एका पिशवीत लोखंडी रॉड लपवून झरीगाव येथील प्रथम श्रेणी न्यायदंडाधिकाऱ्यांच्या न्यायालयात आली. ती एका खटल्यात 'माहिती देणारी' (इन्फॉर्मंट) व्यक्ती होती. सरकारी वकील पटनायक यांनी दिलेल्या तक्रारीनुसार, एका साक्षीदाराची साक्ष नोंदवून ते 'बार रूम'मध्ये आले होते आणि फोनवर कोणाशी तरी बोलत होते. त्याच वेळी, माझी तिथे आली आणि तिने त्यांच्या डोक्यावर लोखंडी सळीने प्रहार केला. पटनायक यांच्या डोक्याला गंभीर दुखापत झाल्यानंतर, आरोपी महिला तिथून पळून जाण्याचा प्रयत्न करू लागली.
गोंधळ ऐकून न्यायालयातील कर्मचारी, साक्षीदार आणि न्यायाधीश स्मिता लाक्रा यांनी जखमी वकिलाला वाचवण्यासाठी धाव घेतली. महिलेने महिला न्यायाधीशांवरही हल्ला केला. यामध्ये त्यांना किरकोळ दुखापत झाली आहे. या सर्व प्रकारादरम्यान गोंधळ ऐकून पोलीस उपनिरीक्षक मिनकेतन गंतयात यांनी आपल्या कक्षातून बाहेर येत महिलेला शांत करण्याचा प्रयत्न केला. मात्र, संतापलेल्या महिलेने त्यांच्याही डोक्यावर रॉडने प्रहार केला. त्यांनाही गंभीर दुखापत होऊन रक्तस्राव झाला.
घटनेनंतर जखमी झालेले न्यायमूर्ती, सहायक सरकारी वकील आणि कोर्ट सब-इन्स्पेक्टर यांना तातडीने वैद्यकीय उपचारासाठी दाखल करण्यात आले होते; प्राथमिक उपचारानंतर त्यांना रुग्णालयातून डिस्चार्ज देण्यात आला आहे. दरम्यान, या हल्ल्यामागील नेमके कारण आणि संबंधित महिलेचा उद्देश अद्याप स्पष्ट झालेला नाही.
न्यायालयातील कर्मचारी आणि सुरक्षा रक्षकांनी आरोपी हल्लेखोर महिला माझी हिला पकडले. तिच्या हातातील लोखंडी रॉड जप्त केला आहे. माझी हिच्यावर पोलिसांनी कारवाई करत तिला अटक केली आहे. दरम्यान, आपल्या तक्रारीत पटनायक यांनी आरोप केला आहे की, ही महिला कोणाचा तरी जीव घेण्याच्या, न्यायालयीन कामकाजात अडथळा आणण्याच्या आणि सरकारी कर्तव्यावर असलेल्या अधिकाऱ्यांवर पूर्वप्रणियोजित (किंवा पूर्व नियोजित) हल्ला करण्याच्या उद्देशानेच तिथे आली होती.