पुढारी ऑनलाईन डेस्क : सुखबीर सिंग बादल (Sukhbir Singh Badal) पुन्हा एकदा शिरोमणी अकाली दल (Shiromani Akali Dal) चे अध्यक्ष बनले आहेत. अमृतसर येथे शनिवारी पंजाब आणि इतर राज्यांतील ५२४ प्रतिनिधींनी सुखबीर सिंग बादल यांची शिरोमणी अकाली दलाच्या (एसएडी) अध्यक्षपदी बिनविरोध निवड केली. यामुळे पक्षाचे सर्वोच्च पद पुन्हा एकदा त्यांच्याकडे आले आहे.
शिखांची सर्वोच्च धार्मिक संस्था अकाली तख्तने धार्मिक गैरवर्तनासाठी त्यांना दोषी जाहीर केले होते. त्यानंतर गेल्या वर्षी १६ नोव्हेंबर रोजी सुखबीर सिंग बादल यांनी पक्षाच्या अध्यक्षपदाचा राजीनामा दिला होता. त्यांचा राजीनामा पक्षाच्या कार्यकारिणीने यावर्षी जानेवारीमध्ये स्वीकारला होता.
शिरोमणी अकाली दलाने 'X' वरील पोस्टमध्ये म्हटले आहे, "पंजाबचे विकासपुरुष सुखबीर सिंग बादल यांचे शिरोमणी अकाली दलाचे अध्यक्ष झाल्याबद्दल अभिनंदन. त्यांनी पंथ आणि पंजाबच्या हक्कांचे मजबूतपणे रक्षण करावे आणि पंजाबला पुन्हा एका समृद्ध बनवावे."
सुखबीर बादल यांनी त्यांचे वडील आणि पक्षप्रमुख प्रकाश सिंग बादल यांच्यानंतर २००८ मध्ये पहिल्यांदा अकाली दलाचे प्रमुख म्हणून पदभार स्वीकारला होता. तेव्हापासून त्यांनी गेल्या वर्षी अध्यक्षपदाचा राजीनामा देईपर्यंत पक्षाचे नेतृत्व केले. त्यांच्या निवडीनंतर आता पक्षातर्फे १३ एप्रिल रोजी तलवंडी साबो (बथिंडा) येथे एक राजकीय परिषद आयोजित केली आहे. तिथे ते पक्षाचे अध्यक्ष म्हणून संबोधित करतील.
शिरोमणी अकाली दलाची स्थापना १४ डिसेंबर, १९२० रोजी झाली. काँग्रेसनंतरचा दुसरा सर्वात जुना पक्ष म्हणून या पक्षाची भारतीय राजकीय इतिहासात नोंद आहे.