Sonam Wangchuk Hunger Strike: शिक्षणतज्ज्ञ आणि पर्यावरण कार्यकर्ते सोनम वांगचुक यांच्या बेमुदत उपोषणाचा आज (दि. १५ जुलै) 18वा दिवस आहे. त्यांची प्रकृती खालावू लागली आहे. सोनम वांगचुक यांच्या खालावत्या प्रकृतीबाबत अनेक सेलिब्रिटींनी तीव्र चिंता व्यक्त केली आहे. शबाना आझमी, झीनत अमान, ओमी वैद्य, अनुराग कश्यप, दिया मिर्झा, अभय देओल आणि अतुल कुलकर्णी यांनी वांगचुक यांना पाठिंबा दर्शवला आहे. तसेच त्यांनी उपोषण मागे घेण्याचेही आवाहन केले आहे.
सोनम वांगचुक हे 28 जूनपासून बेमुदत उपोषणावर आहेत. ते कॉकरोच जनता पार्टी (CJP) आयोजित आंदोलनात सहभागी झाले. या आंदोलनात NEET आणि इतर स्पर्धा परीक्षांतील कथित गैरव्यवहारांप्रकरणी केंद्रीय शिक्षणमंत्री धर्मेंद्र प्रधान यांनी राजीनामा द्यावा, अशी मागणी करण्यात येत आहे. आज वांगचुक यांच्या उपोषणाचा १८ वा दिवस. आंदोलनाच्या आयोजकांच्या म्हणण्यानुसार, उपोषणामुळे वांगचुक यांचे वजन सुमारे 8.5 किलोने घटले असून त्यांच्या प्रकृतीबाबत गंभीर चिंता व्यक्त केली जात आहे.
सोनम वांगचुक यांच्या खालावत्या प्रकृतीबाबत अनेक सेलिब्रिटींनी तीव्र चिंता व्यक्त केली आहे. शबाना आझमी, झीनत अमान, ओमी वैद्य, अनुराग कश्यप, दिया मिर्झा, अभय देओल आणि अतुल कुलकर्णी यांनी त्यांच्या आंदोलनास पाठिंबा दिला आहे.
शबाना आझमी यांनी त्यांच्या इन्स्टाग्राम हँडलवर सोनम वांगचुक यांचा उपोषणस्थळावरील व्हायरल फोटो शेअर केला. त्यांनी लिहिले आहे की, "आपल्या देशाला तुमच्यासारख्या व्यक्तीची खूप गरज आहे. तुम्ही अन्यायाविरुद्ध आणि सत्याच्या बाजूने ठामपणे उभे राहता. आम्हाला सर्वांना तुमचा खूप अभिमान वाटतो. म्हणूनच आम्ही तुम्हाला विनंती करतो की तुम्ही तुमचे उपोषण मागे घ्यावे, कारण तुमचे मार्गदर्शन खरोखरच आमच्या विद्यार्थ्यांचे मनोधैर्य वाढवते. हा लढा सुरूच राहिला पाहिजे आणि त्यासाठी तुमचे निरोगी राहणे अत्यंत आवश्यक आहे. आम्ही सर्वजण तुमच्या पाठीशी आहोत."
अभिनेते अतुल कुलकर्णी यांनीही CJP च्या आंदोलनाला पाठिंबा दर्शविला आहे. 'X' वरील एका पोस्टमध्ये त्यांनी तरुणांना "प्रामाणिकपणा आणि करुणेच्या जोरावर या देशाला नव्याने घडवण्याचे" आवाहन केले आहे. "उद्याचा दिवस महत्त्वाचा आहे; मला तुमच्याकडून अपेक्षा आहेत," असेही त्यांनी म्हटले.
अभय देओलने सोनम वांगचुक यांच्या उपोषणाचा व्हायरल झालेला फोटो आपल्या इन्स्टाग्राम अकाऊंटवर शेअर केला आणि त्यासोबत 'ब्रोकन हार्ट' इमोजी जोडला.
ज्येष्ठ अभिनेत्री झीनत अमान यांनी वांगचुक यांना आपला पाठिंबा दर्शविला आहे. दिल्लीत सुरू असलेल्या त्यांच्या बेमुदत उपोषणाच्या पार्श्वभूमीवर, अमान यांनी सरकारला त्यांच्याशी संवाद साधण्याचे आवाहन केले आहे. इन्स्टाग्रामवर एक भावपूर्ण संदेश शेअर करत, त्यांनी वांगचुक यांच्या प्रकृतीबद्दल चिंता व्यक्त केली आणि संबंधित अधिकाऱ्यांना शांततापूर्ण चर्चेद्वारे त्यांच्या मागण्यांवर तोगडा काढण्याचे आवाहन केले आहे. वांगचुक यांचा फोटो शेअर करताना, राजधानीत उपोषण करत असलेल्या त्यांच्याप्रती आपल्या संवेदना असल्याचे अमान यांनी म्हटले आहे. तसेच झीनत अमान यांनी सोनम वांगचुक यांच्या आजवरच्या शैक्षणिक व सामाजिक कार्याच्या योगदानावरही प्रकाश टाकला आहे.
'३ इडियट्स'मधील 'चतुर' या भूमिकेमुळे घराघरात पोहोचलेला अभिनेता ओमी वैद्य याने सोनम वांगचुक यांना आपला पाठिंबा दर्शविला आहे. त्याने सोशल मीडियावर शेअर केलेल्या भावनिक व्हिडिओमध्ये म्हटलं आहे की, "मला फुंसुख वांगडूचा मृत्यू नको आहे. तुम्हाला माहित आहे का की '३ इडियट्स'मधील 'फुंसुख वांगडू' ही व्यक्तिरेखा प्रत्यक्षात सोनम वांगचुक या लडाखी अभियंता, संशोधक, शिक्षणतज्ज्ञ आणि समाजसुधारक यांच्यावर आधारित आहे? मी त्यांना भेटलो आहे. ते खूपच रंजक व्यक्तिमत्त्व आहेत." वांगचुक यांचा उल्लेख 'नम्र' आणि 'अत्यंत प्रभावी व्यक्ती' असा करत, अभिनेत्याने त्यांच्या योगदानावर प्रकाश टाकला आणि त्यानंतर त्यांच्या आरोग्याबद्दल चिंता व्यक्त केली.
'त्यांचे जीवन अमूल्य आहे', अशी पोस्ट करत बॉलिवूड अभिनेत्री दिया मिर्झाने सोनम वांगचुक यांना समर्थन दर्शविले आहे.
बॉलिवूडमधील प्रयोगशील दिग्दर्शक अनुराग कश्यप यांनी वांगचुक यांना पाठिंबा दर्शविला आहे. कश्यप यांनी या कार्यकर्त्याची खालावलेली प्रकृती आणि त्याकडे प्रशासनाचे असलेले मौन व उघड उदासीनता यांवर टीका केली आहे. कश्यप यांनी आपल्या इन्स्टाग्राम स्टोरीजद्वारे सरकारवर कडक टीका केली. त्यांनी वांगचुक यांचे वर्णन 'धाडसी व्यक्ती' असे केले आहे. वांगचुक जे करत आहेत, ते करण्याचे धाडस आपल्यात नाही, याची कबुलीही दिली.