Police Ganja Raid : केरळ पोलिसांनी अडुप्पूटी (Aduppootty) येथील एका घरावर छापा टाकण्याचा निर्णय घेतला. 'ऑपरेशन तुफान' (Operation Thoofan) सुरू होऊन दोन तास उलटले तरी पोलिसांच्या हाती काहीच लागले नव्हते. पण अचानक स्वयंपाकघरातील कुकरची शिटी वाजली आणि आरोपीचे पितळ उघड झाले.
कुन्नमकुलममधील अडुप्पूटी येथील बिनेशच्या घरात गांजा लपवून ठेवल्याची गोपनीय माहिती कुन्नमकुलमचे सब-इन्स्पेक्टर राकेश यांना मिळाली होती. माहिती मिळताच पोलिसांच्या पथकाने घटनास्थळी पोहोचून कसून झडती सुरू केली. ही तपासणी जवळपास दोन तास चालली. मात्र पोलिसांच्या हाती काहीच लागलं नाही.
बिनेशने पोलीस आपल्या घरावर छापा टाकण्यासाठी येत असल्याचे पाहताच, गांजाचे पाकीट तांदळाने भरलेल्या充 प्रेशर कुकरमध्ये लपवण्याचा प्रयत्न केला. मात्र, त्याचा हा प्लॅन पुरता फसला. आता दोन तासांच्या चौकशीनंतर पोलीस बिनेशच्या घरातून काढता पाय घेणार, तेवढ्यात गॅसवर ठेवलेल्या प्रेशर कुकरची शिटी वाजली.
प्रेशर कुकरची शिटी वाजल्यानंतर पोलिसांना स्वयंपाकघरातून एक वेगळाच तीव्र वास आला. संशय आल्याने पोलिसांनी तातडीने कुकर उघडून पाहिला, तेव्हा उकळत्या तांदळामध्ये लपवून ठेवलेले गांजाचे पाकीट पोलिसांच्या हाती लागले.
पोलिसांनी ४० वर्षीय आरोपीला घटनास्थळावरूनच अटक केली असून त्याच्याकडून एकूण ४०० ग्रॅम गांजा जप्त करण्यात आला आहे. पुढील तपासात समोर आले आहे की, आरोपी बिनेशचा पोलिसांशी सामना होण्याची ही पहिलीच वेळ नव्हती. यापूर्वीही तो दोन गुन्ह्यांमध्ये सामील होता. एका वेगळ्या घटनेत अबकारी निरीक्षकाला आणि त्यांच्या पथकाला चाकू दाखवून धमकावल्याचा आरोपही त्याच्यावर आहे.