PM Modi
नवी दिल्ली : दुबईहून तेल अवीवकडे जाणाऱ्या 'फ्लायदुबई'च्या विमानाच्या कॉकपिटमध्ये घडलेल्या गंभीर घटनेत स्वतः जखमी होऊनही विमानावर नियंत्रण मिळवत १८० प्रवाशांचे प्राण वाचवणारे भारतीय वंशाचे कॅप्टन स्मित मच्छार यांचे पंतप्रधान नरेंद्र मोदी यांनी कौतुक केले आहे. ‘कॅप्टन स्मित मछार हे हिरो आहेत,’ असे म्हणत मोदी यांनी त्यांच्या धाडसाचे अभिनंदन केले.
पंतप्रधान मोदी यांनी ‘एक्स’वर पोस्ट करत कॅप्टन मच्छार यांच्या शौर्याचे कौतुक केले. “मोठ्या धोक्याचा सामना करताना आणि गंभीर जखमी झाल्यानंतरही इतरांचे प्राण वाचवण्यासाठी त्यांनी मोठे धैर्य दाखवले. त्यांच्या शौर्यामुळे शेकडो प्रवाशांचे प्राण वाचले आणि मोठी दुर्घटना टळली. भारताला कॅप्टन मच्छार यांचा अभिमान आहे. ते लवकर बरे होण्यासाठी, नव्या ताकदीसाठी आणि उत्तम आरोग्यासाठी प्रार्थना करतो,” असे मोदी यांनी म्हटले आहे.
फ्लाय दुबईचे FZ1073 हे विमान दुबई आंतरराष्ट्रीय विमानतळावरून इस्रायलमधील बेन गुरियन विमानतळाकडे जात होते. विमान हवेत असताना कॉकपिटमध्ये दोन्ही वैमानिकांमध्ये वाद झाला. सहवैमानिकाने कॅप्टन मच्छार यांच्यावर चाकूने हल्ला केला. या हल्ल्यात गंभीर जखमी होऊनही मच्छार यांनी विमानाचा ताबा घेतला आणि सुरक्षितपणे विमान उतरवले.
या विमानाचे सौदी अरेबियातील तबुक विमानतळावर सुरक्षित लँडिंग करण्यात आले. या घटनेत दोन्ही वैमानिक जखमी झाले असून, त्यांना उपचारासाठी रुग्णालयात दाखल करण्यात आले आहे. घटनेनंतर विमानातून आपत्कालीन संदेश पाठवण्यात आला होता. त्यानंतर सुमारे ३३ हजार फूट उंचीवरून विमान वेगाने खाली आले. मात्र, कॅप्टन मच्छार यांनी परिस्थिती नियंत्रणात आणत विमान सुरक्षित विमानतळावर उतरवले.