इस्रायल-इराण तणावाच्या पार्श्वभूमीवर ऑपरेशन सिंधू अंतर्गत भारतीय नागरिकांना त्यांच्या मायदेशी परतण्याची प्रक्रिया सुरू आहे. मंगळवारी इस्रायलमधून ५४९ भारतीय नागरिकांना घेऊन हवाई दलाची तीन विमाने नवी दिल्लीत पोहोचली. पहिल्या विमानात १६१, दुसऱ्या विमानात १६५ आणि तिसऱ्या विमानात २६८ भारतीय नागरिकांना आणण्यात आले. केंद्रीय परराष्ट्र राज्यमंत्री (एमओएस) पवित्रा मार्गेरिटा आणि केंद्रीय राज्यमंत्री डॉ. एल. मुरुगन यांनी विमानतळावर भारतीय नागरिकांचे स्वागत केले. परदेशातील भारतीय नागरिकांची सुरक्षा ही सरकारची प्राथमिकता आहे, असे परराष्ट्र मंत्रालयाने म्हटलं आहे.
परराष्ट्र मंत्रालयाचे प्रवक्ते रणधीर जयस्वाल यांनी ट्विट केले की ऑपरेशन सिंधूचा इस्रायल टप्पा २३ जून २०२५ रोजी सुरू झाला. यामध्ये १६१ भारतीय नागरिकांची पहिली तुकडी जॉर्डनमधून मायदेशी परत आणण्यात आली. त्यानंतर, हवाई दलाच्या सी-१७ विमानाने इस्रायलमधून १६५ प्रवाशांना परत आणले. मंगळवारी दुपारी २६८ नागरिकांना घेऊन तिसरे विमान भारतात पोहोचले. मशहादहून नवी दिल्ली येथे पोहोचलेल्या एका विशेष विमानाने २९२ भारतीय नागरिकांना इराणमधून बाहेर काढण्यात आले. आतापर्यंत इराणमधून २२९५ भारतीय नागरिकांना परत आणण्यात आले आहे.
"पश्चिम आशियातील संघर्षग्रस्त भागात वाढलेल्या तणावाच्या पार्श्वभूमीवर, भारतीय हवाई दलाच्या सी-१७ विमानांनी जॉर्डन आणि इजिप्तमधून भारतीय नागरिक आणि मित्र देशांच्या नागरिकांना बाहेर काढण्यासाठी मोहिमा सुरू केल्या. "आपल्या गरजूंना मदत करण्यासाठी भारतीय हवाई दल प्रथम प्रतिसाद देणारे म्हणून वचनबद्ध आहे," असे हवाई दलाने X वरील एका पोस्टमध्ये म्हटले आहे.
इस्रायल आणि इराणमधील संघर्ष १३ जून रोजी सुरू झाला जेव्हा इस्रायलने इराणी लष्करी आणि आण्विक स्थळांवर मोठ्या प्रमाणात हवाई हल्ला केला, ज्याचे कोड-नाव "ऑपरेशन रायझिंग लायन" होते. प्रत्युत्तर म्हणून, इराणच्या इस्लामिक रिव्होल्यूशनरी गार्ड कॉर्प्स (IRGC) ने 'ऑपरेशन ट्रू प्रॉमिस ३' नावाची मोठ्या प्रमाणात ड्रोन आणि क्षेपणास्त्र मोहीम सुरू केली, ज्यामध्ये इस्रायली लढाऊ जेट इंधन उत्पादन सुविधा आणि ऊर्जा पुरवठा केंद्रांना लक्ष्य केले गेले. ऑपरेशन मिडनाईट हॅमर अंतर्गत अमेरिकेने रविवारी पहाटे तीन प्रमुख इराणी अणु सुविधांवर अचूक हवाई हल्ले केले होते.