Ashadhi Wari 2024 | आषाढी एकादशीनिमित्त दिल्लीत विठू नामाचा गजर

नवी दिल्ली, पुढारी वृत्तसेवा : आषाढी एकादशीनिमित्त देशाची राजधानी दिल्लीत विठू नामाचा गजर झाला. पंढरपुरात जनसागर उसळला असताना दिल्लीत कॅनॉट प्लेसमधील हनुमान मंदिर ते आर. के. पुरम भागातील विठ्ठल मंदिरापर्यंत सांकेतिक वारीचे आयोजन करण्यात आले होते. या वारीमध्ये दिल्लीतील मराठी नागरिकांनी मोठ्या संख्येने सहभाग घेऊन विठ्ठलाचे नामस्मरण केले. केंद्रीय मंत्री नितीन गडकरी यांनीही विठ्ठल मंदिरात दर्शन घेतले. या सांकेतिक वारीमध्ये नेते मंडळींनीही सहभाग घेतला.

विठ्ठल मंदिरामध्ये भजनाचा कार्यक्रम आयोजित

दरवर्षीप्रमाणे यंदाही सांकेतिक वारीच्या निमित्ताने दिल्लीकर मराठी नागरिक मोठ्या संख्येने एकत्र आले. सकाळी ६ पासून सुरु झालेली वारी १० वाजता विठ्ठल मंदिरात पोहोचली. विठ्ठल मंदिरामध्ये भजनाचा कार्यक्रम आयोजित करण्यात आला होता. या कार्यक्रमात नादब्रम्ह सोनवणे महाराज भजन मंडळ, मुंबई यांच्यासह उपस्थितांनी भजन गायले. यानंतर जग्गनाथ महाराज सोनवणे यांचे किर्तनही झाले.

सांकेतिक वारीमध्ये भाजप प्रदेशाध्यक्ष विरेंद्र सचदेवा, भाजपच्या खासदार बांसुरी स्वराज, खासदार मनोज तिवारी यांनीही सहभाग घेतला. या संपूर्ण कार्यक्रमाचे आयोजन दिल्ली मराठी प्रतिष्ठानतर्फे करण्यात आले.