MP Accident
मध्य प्रदेश : मध्य प्रदेशमधील मंदसौर जिल्ह्यातील नारायणगड येथे देवदर्शनासाठी निघालेल्या भाविकांची कार चालकाचे नियंत्रण सुटल्याने दुचाकीला धडकली आणि रस्त्याच्या बाजूला असलेल्या विहिरीत कोसळली. या अपघातात ७ जणांचा मृत्यू झाला, तर चार जण जखमी झाले. रविवारी दुपारी ही घटना घडली.
नारायणगड पोलीस स्टेशन परिसरातील बुढा-तकरवत क्रॉसिंगवर रविवारी दुपारी २ वाजण्याच्या सुमारास हा अपघात झाला. भरधाव कारने पहिल्यांदा एका दुचाकीला धडक दिली आणि नंतर ती बाजूच्या विहिरीत पडली. या अपघातात आतापर्यंत एकूण ७ जणांचा मृत्यू झाल्याची नोंद झाली आहे. दुचाकीस्वार गोबर सिंग (रा. आबाखेडी) याचा जागीच मृत्यू झाला. तर जखमींना वाचवण्यासाठी विहिरीत उतरलेल्या दोघांचा विषारी गॅसमुळे गुदमरून मृत्यू झाला. तीन वर्षांच्या मुलीसह चार जखमींना वाचवण्यात आले आहे. त्यांना मंदसौर जिल्हा रुग्णालयात उपचारासाठी दाखल करण्यात आले. दरम्यान, मृतांची संख्या वाढू शकते.
कारमध्ये १३ लोक होते, जे उज्जैन जिल्ह्यातील उन्हेल येथून नीमच जिल्ह्यातील अंतरी माता मंदिरात दर्शन घेण्यासाठी जात होते. अपघातानंतर विहिरीतून क्रेनच्या मदतीने इको व्हॅन बाहेर काढण्यात आली. घटनेची माहिती मिळताच उपमुख्यमंत्री जगदीश देवदा, जिल्हाधिकारी अदिती गर्ग, एसपी अभिषेक आनंद, अतिरिक्त एसपी गौतम सोलंकी आणि एसडीओपी नरेंद्र सोलंकी घटनास्थळी पोहोचले.
उपमुख्यमंत्री जगदीश देवदा यांनी सांगितले की, चालकाचे व्हॅनवरील नियंत्रण सुटल्याने व्हॅन रस्त्यावरून विहिरीत पडली. मृत्यूंची संख्या स्पष्ट नाही. व्हॅनमध्ये दोन मुले होती. चार जणांना वाचवण्यात आले असून त्यांना रुग्णालयात दाखल करण्यात आले आहे. विहिरीत विषारी वायू असल्याने बचाव कार्य वेगाने सुरू आहे," असे ते म्हणाले.