Mahua Moitra Dharmendra Pradhan: नीट पेपर लीक प्रकरण आणि विद्यार्थ्यांच्या आंदोलनाच्या पार्श्वभूमीवर केंद्रीय शिक्षणमंत्री धर्मेंद्र प्रधान यांच्याविरोधातील राजकीय वातावरण आणखी तापलं आहे. तृणमूल काँग्रेसच्या खासदार महुआ मोईत्रा यांनी धर्मेंद्र प्रधान यांच्यावर तीव्र शब्दांत टीका करत, "संघ फक्त माफीनामा लिहायला शिकवतो, राजीनामा नाही," असा बोचरा टोला लगावला आहे.
महुआ मोईत्रा यांनी सोशल मीडिया प्लॅटफॉर्म 'एक्स'वर पोस्ट करत म्हटले की, "कदाचित शिक्षणमंत्र्यांना राजीनामा कसा लिहायचा हेच माहीत नसेल. कारण आरएसएस फक्त माफीनामा लिहायला शिकवतो." त्यांच्या या वक्तव्यामुळे राजकीय वर्तुळात चर्चा सुरु झाली आहे.
दिल्लीतील जंतर-मंतरवर सुरू असलेल्या विद्यार्थ्यांच्या आंदोलनाला तृणमूल काँग्रेसने सुरुवातीपासूनच पाठिंबा दिला आहे. महुआ मोईत्रा आणि खासदार सागरिका घोष यांनी आंदोलनस्थळी जाऊन आंदोलनकर्त्यांची भेट घेतली. याशिवाय पश्चिम बंगालच्या मुख्यमंत्री ममता बॅनर्जी यांनीही आंदोलनकर्ते सोनम वांगचुक यांच्याशी दूरध्वनीवरून संवाद साधत आंदोलनाला पाठिंबा दिला.
दरम्यान, लोकसभेतील विरोधी पक्षनेते राहुल गांधी यांनीही विद्यार्थ्यांवरील पोलिस कारवाईवरून केंद्र सरकारवर जोरदार टीका केली. त्यांनी पंतप्रधान मोदी आणि केंद्रीय गृहमंत्री अमित शाह यांच्या राजीनाम्याची मागणी करत पंतप्रधान नरेंद्र मोदी यांनी विद्यार्थ्यांची माफी मागावी, असे म्हटले.
राहुल गांधी यांनी संसद परिसरात पत्रकारांशी बोलताना सांगितले की, विद्यार्थी शिक्षण व्यवस्था आणि परीक्षा प्रणालीतील त्रुटींविरोधात आंदोलन करत आहेत. त्यांच्या मागण्या चुकीच्या नाहीत. सरकारने आंदोलन दडपण्यासाठी पोलिसांचा वापर करण्याऐवजी विद्यार्थ्यांशी संवाद साधावा.
यापूर्वी राहुल गांधी यांनी विरोधी पक्षांच्या नेत्यांसह लोकसभा अध्यक्ष ओम बिर्ला यांची भेट घेत विद्यार्थ्यांच्या आंदोलनावर संसदेत चर्चा घ्यावी, अशी मागणी केली. यावर सरकारशी चर्चा करून निर्णय घेतला जाईल, असे लोकसभा अध्यक्षांनी सांगितल्याची माहिती राहुल गांधी यांनी दिली.
नीट पेपर लीक प्रकरण, विद्यार्थ्यांचे आंदोलन आणि त्यावरून सुरू झालेल्या आरोप-प्रत्यारोपांमुळे केंद्र सरकार आणि विरोधकांमध्ये संघर्ष अधिक तीव्र होताना दिसत आहे. दरम्यान, धर्मेंद्र प्रधान यांच्या राजीनाम्याची मागणी आणि विद्यार्थ्यांच्या आंदोलनाला मिळणारा वाढता राजकीय पाठिंबा यामुळे हे प्रकरण आणखी तापण्याची चिन्हे आहेत.