Amita Tomar Scam Case: मध्य प्रदेशमधील श्योपुर जिल्ह्यातील विजयपूर तहसीलदार अमिता सिंह तोमर यांना सर्वोच्च न्यायालयाने मोठा धक्का दिला आहे. पूरग्रस्तांसाठी दिल्या जाणाऱ्या मदतनिधीतील कथित घोटाळ्याप्रकरणी त्यांच्या अटकपूर्व जामीन अर्जाला सर्वोच्च न्यायालयाने नकार दिला आहे. यामुळे त्यांच्या अटकेची शक्यता वाढली असून प्रशासनात मोठी खळबळ उडाली आहे.
2021 मध्ये श्योपुर जिल्ह्यात मोठ्या प्रमाणावर पूर आला होता. त्यानंतर नागरिकांना मदत म्हणून शासनाकडून निधी वितरित करण्यात आला. मात्र, या प्रक्रियेत मोठ्या प्रमाणात गैरव्यवहार झाल्याचा आरोप आहे.
तपासानुसार, त्या वेळी बडौदा तहसीलमध्ये कार्यरत असलेल्या अमिता सिंह तोमर आणि इतर अधिकाऱ्यांनी मिळून तब्बल 127 बनावट खात्यांमध्ये सुमारे 2.57 कोटी रुपयांची रक्कम वळवली. या प्रकरणात सुमारे 25 तलाठी आणि 100 हून अधिक मध्यस्थांचा सहभाग असल्याचं समोर आलं आहे.
या संपूर्ण प्रकाराचा भांडाफोड डिप्टी कलेक्टर यांच्या ऑडिटदरम्यान झाला. त्यानंतर बडौदा पोलीस ठाण्यात गुन्हा दाखल करण्यात आला आणि तपासाला वेग आला.
अटक टाळण्यासाठी अमिता सिंह तोमर यांनी प्रथम ग्वालियर खंडपीठात अटकपूर्व जामीनासाठी अर्ज केला होता. मात्र, न्यायालयाने तो फेटाळला. त्यानंतर त्यांनी सर्वोच्च न्यायालयात धाव घेतली.
17 मार्च 2026 रोजी सर्वोच्च न्यायालयानेही त्यांचा अर्ज फेटाळून लावला. त्यामुळे आता त्यांच्या समोर दोनच पर्याय उरले आहेत. स्वतःहून शरण जाणं किंवा पोलिसांकडून अटक होणं.
तपासात असं समोर आलं आहे की, पूरग्रस्तांच्या नावाखाली नातेवाईक आणि ओळखीच्या लोकांना लाभार्थी दाखवून त्यांच्या खात्यांमध्ये पैसे जमा करण्यात आले. या कथित घोटाळ्यात महसूल विभागातील कर्मचारी आणि मध्यस्थ यांचे संगनमत असल्याचा आरोप आहे.
सर्वोच्च न्यायालयाच्या निर्णयानंतर प्रशासनिक यंत्रणेत मोठी हालचाल सुरू झाली आहे. पोलिसांकडून कधीही अमिता सिंह तोमर यांना अटक होऊ शकते, अशी शक्यता व्यक्त केली जात आहे.
विशेष म्हणजे, अमिता सिंह तोमर या याआधीही चर्चेत आल्या होत्या. त्या लोकप्रिय शो 'कौन बनेगा करोड़पती' मध्ये सहभागी होऊन 50 लाख रुपये जिंकल्या होत्या. त्या वेळी त्यांची यशोगाथा चर्चेत होती. मात्र आता त्यांचं नाव वेगळ्याच कारणामुळे पुन्हा एकदा बातम्यांमध्ये झळकत आहे.
या प्रकरणात पुढील कारवाई काय होते, याकडे सर्वांचं लक्ष लागलं आहे. न्यायालयाच्या निर्णयानंतर आता तपास अधिक तीव्र होण्याची शक्यता असून, या प्रकरणातील इतर आरोपींवरही कारवाई होऊ शकते.