US Israel Iran Attack Jammu Kashmir protests
श्रीनगर: इराणचे सर्वोच्च नेते अयातुल्लाह अली खामेनेई यांचा इस्रायल आणि अमेरिकेच्या संयुक्त हल्ल्यात मृत्यू झाला आहे. खामेनेई यांच्या मृत्यूनंतर जम्मू-काश्मीरमधील अनेक भागांत तीव्र निदर्शने करण्यात आली. श्रीनगर, सोनवारी आणि बांदीपोरा यांसारख्या भागांत मोठ्या संख्येने शिया समुदायातील महिला व पुरुष रस्त्यावर उतरले होते. 'आम्ही आमच्या नेत्याचे बलिदान कधीही विसरणार नाही', अशा घोषणा देत आंदोलकांनी खामेनेई यांचे फोटो हातात धरून आपला निषेध नोंदवला.
बारामूला येथील एका महिला आंदोलकाने आपल्या भावना व्यक्त करताना सांगितले की, "शिया समुदाय बलिदान पत्करायला घाबरत नाही. आम्ही खामेनेई यांच्या पाठीशी ठामपणे उभे आहोत." तर रामबनमधील शिया नेते सैयद समर काजमी यांनी या हल्ल्याचा तीव्र निषेध केला. ते म्हणाले, "आम्ही आमचा प्रिय नेता गमावला आहे, पण त्यांचे कार्य आम्ही विसरणार नाही. अमेरिका आणि इस्रायलने कशा प्रकारे फसवणूक करून ही हत्या केली, हे आम्ही येणाऱ्या पिढ्यांना सांगू. जगाने मौन पाळले असताना खामेनेई यांनी पॅलेस्टाईनमधील अत्याचाराविरोधात आवाज उठवला, म्हणूनच त्यांना लक्ष्य करण्यात आले."
जम्मू-काश्मीरच्या माजी मुख्यमंत्री महबूबा मुफ्ती यांनी या हल्ल्याचा तीव्र शब्दांत निषेध केला. त्यांनी 'X' वर पोस्ट करत म्हटले की, "इराणवर पुन्हा एकदा इस्रायलने केलेले आक्रमण निषेधार्ह आहे. इराण हा मुस्लिमांचा एक कणखर आवाज आहे. कोणतीही क्षेपणास्त्रे किंवा धमक्या इराणचे सार्वभौमत्व आणि मनोबल नष्ट करू शकत नाहीत."
हुर्रियत नेते मीरवाइज उमर फारूक यांनीही या हल्ल्याची निंदा केली. आंतरराष्ट्रीय समुदायाकडून इस्रायलला लगाम घातला जात नसल्यामुळेच अशा प्रकारची मनमानी वाढत असल्याचे त्यांनी आपल्या निवेदनात म्हटले आहे.
खामेनेई यांच्या निधनानंतर इराण सरकारने देशात ४० दिवसांचा राष्ट्रीय दुखवटा आणि सात दिवसांची सुट्टी जाहीर केली आहे. या भीषण हल्ल्यात केवळ खामेनेईच नव्हे, तर त्यांची मुलगी, जावई, नातू आणि इराणचे सात उच्चपदस्थ लष्करी अधिकारीही ठार झाले आहेत.