how to reduce lpg gas consumption in winter and make the cylinder last longer know 5 smart cooking tips
पुढारी ऑनलाईन :
सध्या थंडीचा कडाका चांगलाच जाणवत आहे. कडाक्याच्या थंडीमध्ये स्वयंपाकाच्या गॅसचा वापर वाढल्याने घरगुती बजेटवर मोठा परिणाम होतो. अनेक महिला तक्रार करतात की, हिवाळ्यात गॅस सिलेंडर उन्हाळ्याच्या तुलनेत लवकर संपतो. पण यामागे खरंच फक्त थंडीच कारणीभूत आहे का, की आपल्या स्वयंपाकाच्या सवयी? या ५ टिप्समधून तुम्हाला याचे योग्य उत्तर मिळेल.
हिवाळा आपल्या सोबत भरपूर ताज्या भाज्या आणि चविष्ट पदार्थ घेऊन येतो, पण त्याचबरोबर स्वयंपाकघराच्या खर्चातही वाढ करतो. तुम्ही कधी लक्ष दिले आहे का की जसे तापमान कमी होतो, तशी गॅस सिलेंडरची “आयुष्य” देखील कमी होते? अनेक घरांमध्ये असे मानले जाते की थंडीमध्ये गॅस जास्त खर्च होणे स्वाभाविक आहे. मात्र प्रत्यक्षात आपल्या काही छोट्या-छोट्या निष्काळजी सवयी यासाठी जबाबदार असतात.
स्वयंपाकाची जीवनशैली न बदलता, फक्त काम करण्याच्या पद्धतीत थोडा बदल करून तुम्ही गॅसची नासाडी थांबवू शकता आणि मौल्यवान वेळही वाचवू शकता. तर चला जाणून घेऊया त्या स्मार्ट युक्त्या, ज्या या हिवाळ्यात तुमचे स्वयंपाकघर अधिक किफायतशीर बनवतील.
१) फ्रिजमधील थंड पदार्थ थेट गॅसवर ठेवू नका
हिवाळ्यात अनेकजण भाज्या, दूध किंवा मळलेले पीठ फ्रिजमध्ये ठेवतात. फ्रिजमधून थेट थंड पदार्थ काढून गॅसवर ठेवल्यास ते गरम होण्यासाठी आणि शिजण्यासाठी अधिक गॅस खर्च होतो. स्वयंपाक सुरू करण्यापूर्वी किमान ३०–४५ मिनिटे आधी आवश्यक साहित्य फ्रिजमधून बाहेर काढा. साहित्य खोलीच्या तापमानावर आल्यानंतरच शिजवा. यामुळे गॅसचा वापर १० ते १५ टक्क्यांपर्यंत कमी होऊ शकतो.
२) बर्नरची स्वच्छता आणि निळी ज्वाला
हिवाळ्यातील ओलावा किंवा सांडलेले अन्न यामुळे बर्नरची छिद्रे बंद होतात. जर गॅसची ज्वाला पिवळी किंवा नारिंगी दिसत असेल, तर समजून घ्या की गॅस वाया जात आहे आणि भांडी काळी पडत आहेत. आठवड्यातून एकदा जुन्या टूथब्रशने आणि साबणाच्या पाण्याने बर्नर स्वच्छ करा. नेहमी लक्षात ठेवा बर्नरवरून निळी ज्वालाच निघायला हवी.
३) प्रेशर कुकर आणि झाकण लावून स्वयंपाक
हिवाळ्यात थंड हवा उष्णता लवकर शोषून घेते. उघड्या भांड्यात स्वयंपाक केल्यास वाफेसोबत ऊर्जा बाहेर जाते. शक्य तिथे प्रेशर कुकरचा वापर करा; तो उघड्या भांड्याच्या तुलनेत सुमारे ७० टक्के गॅस वाचवतो. कढईत स्वयंपाक करत असाल, तर ती नेहमी झाकणाने झाका. त्यामुळे वाफेच्या दाबाने अन्न लवकर शिजते आणि गॅसची बचत होते.
४) पाण्याचे योग्य प्रमाण वापरा
हिवाळ्यात डाळ किंवा भाज्या शिजवताना अनेकदा गरजेपेक्षा जास्त पाणी घातले जाते. जास्त पाणी उकळायला आणि नंतर आटवायला अधिक गॅस खर्च होतो. त्यामुळे फक्त आवश्यक तेवढेच पाणी वापरा. तसेच डाळी किंवा तांदूळ शिजवण्याआधी अर्धा तास पाण्यात भिजत ठेवा. भिजवलेले धान्य लवकर शिजते, त्यामुळे वेळ आणि गॅस दोन्हीची बचत होते.
५) छोट्या बर्नरचा वापर आणि आधीची तयारी
अनेकजण गॅस पेटवून नंतर भाज्या चिरणे किंवा मसाले शोधणे सुरू करतात. या वेळेत गॅस विनाकारण जळत राहतो. तसेच मोठ्या बर्नरचा अनावश्यक वापर केल्याने गॅस लवकर संपतो. ‘मिस-एन-प्लेस’ तंत्र वापरा. म्हणजे स्वयंपाक सुरू करण्यापूर्वी सगळी कापाकापी आणि मसाले तयार ठेवा. शक्यतो छोट्या बर्नरचा वापर करा, कारण मोठ्या बर्नरची ज्वाला अनेकदा भांड्याच्या कडांबाहेर जाऊन हवेत वाया जाते.