CJP Members Detained: दिल्लीतील जंतर-मंतर येथे कॉकरोच जनता पार्टीच्या (CJP) सदस्यांना दिल्ली पोलिसांनी ताब्यात घेतले आहे. संघटनेने सोशल मीडियावर दिलेल्या माहितीनुसार, सौरव दास, सह-संयोजक आशुतोष रांका आणि अजिंक्य शिंदे यांच्यासह संघटनेच्या इतर सदस्यांवर ही कारवाई करण्यात आली.
मिळालेल्या माहितीनुसार, हे सर्वजण सकाळी तिरंगा घेऊन जंतर-मंतर येथे पोहोचले होते. त्यानंतर दिल्ली पोलिसांनी त्यांना ताब्यात घेतले. मात्र, पोलिसांनी ही कारवाई नेमकी कोणत्या कारणामुळे केली, याबाबत अद्याप सविस्तर माहिती समोर आलेली नाही.
या कारवाईनंतर कॉकरोच जनता पार्टीचे संस्थापक अभिजीत दिपके यांनी सोशल मीडियावर प्रतिक्रिया दिली. त्यांनी पंतप्रधान नरेंद्र मोदी यांना टॅग करत ‘तुम्ही आवाज दाबू शकत नाही,’ असे म्हटले.
या पोस्टमधून त्यांनी आंदोलकांना ताब्यात घेण्याच्या कारवाईवर प्रश्न उपस्थित केले. संघटनेने शेअर केलेल्या माहितीनुसार, सौरव दास, आशुतोष रांका आणि अजिंक्य शिंदे यांच्यासह इतर सदस्यांनाही पोलिसांनी ताब्यात घेतले आहे.
जंतरमंतर हे आंदोलनाचे ठिकाण म्हणून बंद करण्यात आल्याच्या प्रकरणावर दिल्ली उच्च न्यायालयात आज, मंगळवारी सुनावणी होणार आहे. सोमवारी न्यायालयाने या प्रकरणासोबतच आंदोलनादरम्यान ‘बाहेरील लोकांनी’ घुसखोरी केल्याचा आणि आंदोलकांना त्रास दिल्याचा आरोप करणाऱ्या अन्य याचिकेवरही आज सुनावणी घेण्यास सहमती दर्शवली आहे.
दरम्यान, या प्रकरणात पोलिसांनी किती जणांना ताब्यात घेतले आणि त्यामागचे नेमके कारण काय आहे, याबाबत अधिकृत तपशील अद्याप समोर आलेला नाही. त्यामुळे दिल्ली पोलिसांची पुढील भूमिका आणि या कारवाईबाबतची अधिकृत माहिती महत्त्वाची ठरणार आहे.