Delhi High Court On Police Force: दिल्ली पोलिसांनी कॉक्रोज जनता पार्टीच्या आंदोलनावेळी अतिरिक्त बळाचा वापर केला या विरूद्ध याचिका दाखल झाली असून दिल्ली उच्च न्यायालयाने या याचिकेवर त्वरित सुनावणी घेण्यास नकार दिला. सोमवारी संसदेवरील मार्चवेळी दिल्ली पोलीसांनी अतिरिक्त बळाचा वापर केल्याचा दावा करण्यात आला आहे.
या याचिकेबाबत बोलताना दिल्ली उच्च न्यायालयाचे जस्टिस डी.के. उपाध्याय आणि जस्टिस तेजस करिया यांनी याचिकाकर्त्यांना आम्हाला याच्यात ओढू नका असं सांगितलं. दरम्यान, या याचिकेवर बुधवारी सुनावणी होणार आहे.
याचिकाकर्त्यांनी या बेंचला त्वरित सुनावणी घेण्याची विनंती केली होती. त्यांनी दिल्ली पोलीस आंदोलन दाबण्यासाठी अतिरिक्त बळाचा वापार करत आहेत असं म्हटलं आहे.
आमरण उपोषणावर बसलेल्या सोनम वांगचुक यांना शनिवारी बळजबरीने रूग्णालयात दाखल केल्यानंतर कॉक्रोज जनता पार्टीने आंदोलन सुरू केलं. सोनम वांगचुक हे २१ दिवस उपाषणावर होते. सोनम वांगचुक आणि कॉक्रोज जनता पार्टीने केंद्रीय शिक्षण मंत्री धर्मेंद्र प्रधान यांचा नीट पेपर लीक प्रकरणी राजीनामा मागितला आहे.
या आंदोलनाला हिंसक वळण लागल्यानंतर जवळपास १७८ लोकं जखमी झाले आहेत. यात आंदोलक तसेच सुरक्षा अधिकाऱ्यांचा देखील समावेश आहे. या हिंसाचारात वरिष्ठ अधिकाऱ्यांसह ११८ पोलीस जखमी झाले आहेत.
पोलिसांकडून, 'नियम मोडणारे, आक्रमक आणि हिंसक वृत्तीच्या हिंसक जमावाने हल्ला केल्याचा दावा करण्यात आला आहे. या धुमश्चक्रीत ६० आंदोलक देखील जखमी झाले आहेत.' अशी माहिती देण्यात आली.
सीजेपी प्रवक्त्यांनी, 'भारतीय लोकशाहीच्या इतिहासात हा सर्वात लाजीरवाणा दिवस आहे. विद्यार्थी एका गंभीर विषयासाठी इथं आपल्या मागण्या घेऊन आले आहेत. त्यांना दिल्ली पोलीस क्रूरतेनं मारत आहे.' दरम्यान, कॉक्रोज जनता पार्टीने जोपर्यंत ते शिक्षण मंत्र्यांचा राजीनामा घेत नाहीत तोपर्यंत आपलं आदोलन थांबवणार नाहीत असं जाहीर केलं आहे.