पाटणा ः वृत्तसंस्था
निवडणुकीत एनडीएला दणदणीत विजय मिळाल्यानंतर बिहारचे पुढील मुख्यमंत्री कोण होणार, यावर जोरदार चर्चा सुरू असतानाच लोजप (रामविलास) प्रमुख चिराग पासवान यांनी शनिवारी जद(यू) प्रमुख नितीशकुमार यांची भेट घेतली, ज्यामुळे राजकीय वर्तुळात चर्चांना उधाण आले आहे. एकेकाळचे नितीश यांचे कट्टर विरोधक असलेल्या पासवान यांनी आपण केवळ जद(यू) प्रमुखांचे अभिनंदन करण्यासाठी गेलो होतो, असे म्हटले असले, तरी त्यांच्या पक्षाच्या दमदार कामगिरीनंतर ते उपमुख्यमंत्री पदावर डोळा ठेवून असल्याची चर्चा सुरू झाली आहे.
पासवान यांनी पोस्ट केलेल्या छायाचित्रांमध्ये नितीशकुमार त्यांचे ते उत्साहात स्वागत करताना दिसत आहेत आणि दोघेही नेते जुने कटू संबंध आणि तणावपूर्ण इतिहास मागे सोडून कॅमेऱ्यासमोर हसताना दिसत आहेत.
तणावपूर्ण निवडणुकीचा इतिहास
बिहार निवडणुकीत एनडीएने 202 जागा जिंकून मोठा विजय मिळवल्यानंतर आणि महाआघाडीचा धुव्वा उडवल्यानंतर दुसऱ्याच दिवशी ही भेट झाली आहे. तथापि, चिराग पासवान यांच्या पक्षाने जिंकलेल्या 19 जागांमुळेच आघाडीची वाटचाल 200 जागांच्या पुढे गेली.
पासवान यांचा वाढता प्रभाव
लोकजनशक्ती पक्षाचे प्रमुख चिराग पासवान यांच्या पक्षाने लढवलेल्या 29 पैकी 19 जागा जिंकून लोक जनशक्ती पार्टी (रामविलास) प्रमुखांनी बिहारमध्ये पुन्हा एकदा आपले महत्त्व सिद्ध केले आहे. त्यांच्या या कामगिरीमुळेच राष्ट्रीय लोकशाही आघाडीला (एनडीए) 200 जागांचा टप्पा ओलांडण्यास मदत झाली. उमेदवार निवडीवरून नाराजीची चर्चा असूनही लोजपने (रामविलास) महाआघाडीकडून 17 जागा खेचून आणल्या आहेत, ही बाब या विजयाला अधिक महत्त्वपूर्ण बनवते.
बिहारमध्ये चिराग यांचा वाढता प्रभाव जागावाटपाच्या चर्चेदरम्यानच स्पष्ट झाला होता, जेव्हा 2020 च्या विधानसभा निवडणुकीत त्यांच्या पक्षाच्या 143 उमेदवारांपैकी फक्त एकाचा विजय झाला असूनही, त्यांना योग्य वाटा मिळाला. 2024 च्या लोकसभा निवडणुकीत लोजपने (रामविलास) लढवलेल्या पाचही जागा जिंकल्या होत्या आणि याच कामगिरीतून त्यांना वाटाघाटी करण्याची ताकद मिळाली.