Chhattisgarh IED Blast
रायपूर : छत्तीसगडमधील कांकेर जिल्ह्यात नक्षलवाद्यांचे भ्याड कृत्य समोर आले आहे. नक्षलवाद्यांनी पेरलेल्या एका सुरुंग स्फोटात ३ जवान शहीद झाले असून, एक जवान जखमी झाला आहे. मिळालेल्या माहितीनुसार, डीआरजीचे (DRG) जवान एक आयईडी निष्क्रिय करण्याचा प्रयत्न करत असतानाच त्याचा स्फोट झाला. या घटनेत एका निरीक्षकासह डीआरजीचे ३ जवान शहीद झाले आहेत.
विशेष बाब म्हणजे, ३१ मार्च रोजी नक्षलवादमुक्त घोषित केल्यानंतर राज्यातील नक्षलवादी कारवायांशी संबंधित हा पहिलाच स्फोट आहे. एका पोलीस अधिकाऱ्याने दिलेल्या माहितीनुसार, हा स्फोट छोटेबेठिया पोलीस ठाण्याच्या हद्दीतील जंगलात झाला. हा परिसर नारायणपूर जिल्ह्याच्या सीमेजवळ आहे.
पोलीस अधिकाऱ्याने सांगितले की, डीआरजीचे पथक नक्षलवाद्यांनी पेरलेले आयईडी शोधून ते निष्क्रिय करण्याची मोहीम राबवत असताना हा स्फोट झाला. या मोहिमेदरम्यान सुरक्षा दलांना एक आयईडी सापडला होता. तो निष्क्रिय करत असताना अचानक स्फोट झाला, ज्यामुळे ४ जवान गंभीर जखमी झाले. त्यापैकी ३ जवानांचा उपचारापूर्वीच मृत्यू झाला.या दुर्दैवी घटनेत निरीक्षक सुखराम वट्टी, कॉन्स्टेबल कृष्णा कोमरा आणि कॉन्स्टेबल संजय गढपाले यांनी घटनास्थळीच प्राण गमावले. तर कॉन्स्टेबल परमानंद कोमरा हे या घटनेत जखमी झाले असून त्यांच्यावर सध्या उपचार सुरू आहेत.
बस्तर रेंजचे पोलीस महानिरीक्षक (IG) पी. सुंदरराज यांनी सांगितले की, "कांकेर जिल्हा पोलिसांचे पथक आयईडी निष्क्रिय करण्याचा प्रयत्न करत असताना ही दुर्दैवी घटना घडली. अचानक झालेल्या स्फोटामुळे ३ जवान शहीद झाले असून १ जवान गंभीर जखमी आहे."
आयजी पी. सुंदरराज यांनी पुढे नमूद केले की, अलीकडेच शरण आलेल्या नक्षलवाद्यांकडून मिळालेली माहिती आणि गुप्तचर यंत्रणांच्या इनपुट्समुळे मोठी यश संपादन करता आली आहेत. कांकेरसह बस्तर रेंजमधील ७ जिल्ह्यांत नक्षलवाद्यांनी आधीच पेरलेले शेकडो आयईडी बॉम्ब शोधून काढण्यात आले आहेत. इतकेच नाही तर हे आयईडी वेळेत आणि सुरक्षितपणे निष्क्रियही करण्यात आले आहेत.