पुढारी ऑनलाईन डेस्क : उत्तराखंडमधील उत्तरकाशी (Uttarakhand Earthquake) भागाला शुक्रवारी सकाळी भूकंपाचे तीन धक्के बसला. येथे ३.५ रिश्टर स्केल तीव्रतेच्या भूकंपाची नोंद झाली असल्याची माहिती राष्ट्रीय भूकंपशास्त्र केंद्राने (NCS) दिली आहे. हा भूकंप ५ किमी खोलीवर भूगर्भात झाला आहे.
उत्तरकाशीला आज सकाळी भूकंपाचे तीन धक्के जाणवले. यामुळे लोक घाबरून घराबाहेर आले. या भूकंपाची तीव्रता ३.५ रिश्टर स्केल इतकी नोंदवली गेली. त्याचे केंद्र उत्तरकाशीत होते. भूकंपाचे धक्के सौम्य स्वरुपाचे होते. दरम्यान, स्थानिक प्रशासनाने लोकांना सावधगिरी बाळगण्याचे आवाहन केले आहे.
राष्ट्रीय भूकंपशास्त्र केंद्राच्या माहितीनुसार, उत्तरकाशीत सकाळी ८.१९ वाजता भूकंपाचा तिसरा धक्का बसला. त्याआधी सकाळी ७.४१ वाजता भूकंपाचा पहिला धक्का जाणवला. यानंतर आणखी एक धक्का बसला. सलग बसलेल्या या भूकंपांच्या धक्क्यामुळे लोक घराबाहेर पडले.