नाशिक : पुढारी वृत्तसेवा; नाशिकमध्ये तयार करणाऱ्या एमडी (मेफेड्रॉन) ड्रग्जचा मुख्य सूत्रधार ललित पानपाटील याच्यासह त्याचा लहान भाऊ भूषण पानपाटील व मित्र अभिषेक बलकवडे यांचा थेट संबंध पोलिसांनी उजेडात आणला आहे. पुणे पोलिसांनी उत्तर प्रदेशमधून भूषण व अभिषेकला अटक केली असून, त्यांचा एमडी ड्रग्ज तयार करण्यापासून वितरणातील सहभाग तपासत आहेत. या त्रिकूटाने छोटा राजन गँगमधील गुन्हेगारांसोबत संपर्क करीत ड्रग्ज बनवल्याचेही समोर आले आहे. (Nashik MD Drug Case)
संबधित बातम्या :
पुणे येथील ससून रुग्णालयातून २ ऑक्टोबर रोजी फरार झालेल्या ड्रग्जमाफिया ललित पाटीलचे छोटा राजन गँगशी संबंध असल्याचे तपासात उघड झाले आहेत. छोटा राजनचे साथीदार तुषार काळे आणि राकेश खानिवडेकर यांच्या संपर्कात राहून ललितने एमडी बनवण्याचे प्रशिक्षण घेतल्याचे समोर येत आहे. नायजेरियन व्यक्तीमार्फत त्यांनी एमडी ड्रग्ज बनवण्याचा फॉर्म्युला शिकत स्वत:चा कारखाना टाकून ड्रग्ज बनवण्यास सुरुवात केली. दरम्यान, पोलिसांनी पुणे येथील कारखान्यावर कारवाई करीत संशयितांची धरपकड केली. त्यानंतर ललितने भूषणला शिंदे गावात कारखाना सुरू करण्यास सांगितले. त्यानुसार भूषणने कारखाना सुरू करून एमडी ड्रग्ज बनवण्यास सुरुवात केली. तर अभिषेकच्या माध्यमातून ड्रग्जचा पुरवठा केला जात असल्याचे समोर येत आहे. (Nashik MD Drug Case)
ललितचे कारागृहातील पोलिसांशी संबंध
ललित हा कारागृहात असताना 'एन्काउंटर स्पेशालिस्ट' म्हणून ओळख असलेल्या पोलिस अधिकाऱ्याशी संपर्कात आल्याचे पोलिस तपासात समोर येत आहे. पुण्यातील येरवडा कारागृहात ललितने अधिकाऱ्यासोबत ओळख करीत कारागृहातील यंत्रणेला हाताशी धरून दोघे रुग्णालयात दाखल झाल्याचा संशय वर्तवला जात आहे.
अभिषेककडे वितरण, पैसे वसुलीची जबाबदारी
पोलिसांच्या तपासात ललित पाटील याने महाराष्ट्रासह परराज्यात नेटवर्क तयार केले. एमडी ड्रग्जच्या मालाची मागणी विचारात घेत त्यानुसार तो लहान भाऊ भूषण यास एमडी बनवण्यास सांगत होता. केमिकल इंजिनिअरिंगपर्यंत शिक्षण केलेल्या भूषण एमडी बनवून त्याचा साठा ललितपर्यंत पोहोच करत असल्याचा अंदाज वर्तवला जात आहे. तर अभिषेक बलकवडे याने एमडी व्यवसायात दोघा भावांना मदत केल्याचे समोर आले आहे. एमडी तयार केल्यावर पुढील वितरण व पैसे वसुलीची जबाबदारी अभिषेकवर असल्याचे तपासात उघड होत आहे.
भुषण, अभिषेकचा ताबा नाशिक पोलिस घेणार
उत्तरप्रदेश येथून पकडलेल्या संशयित भूषण पानपाटील-पाटील व अभिषेक बलकवडे यांच्या पोलिस कोठडीची मागणी शहर पोलिस करणार आहेत. पोलिस आयुक्त अंकुश शिंदे यांनी दिलेल्या माहितीनुसार, मुंबई व पुणे पोलिसांच्या तपासात नाशिक पोलिसांचाही सहभाग आहे. एक पथक तिथे कार्यरत आहे. संशयितांच्या चौकशीतून शिंदे गावासह शहरात इतरत्र ड्रग्ज कारखाने सुरू असल्यास निश्चितपणे ठोस कारवाई केली जाईल असे शिंदे यांनी सांगितले.