Mangrulpir Road Accident
वाशीम : मंगरूळपीर तालुक्यातील कवठळ येथे भरधाव कारच्या धडकेत सात वर्षीय मुलीचा दुर्दैवी मृत्यू झाल्याची घटना शनिवारी (दि.४) घडली. आठवडी बाजारातून आजोबांसोबत घरी परतत असताना रस्ता ओलांडण्याच्या वेळी हा अपघात झाला. या संपूर्ण घटनेचे दृश्य परिसरातील सीसीटीव्ही कॅमेऱ्यात कैद झाले आहे.
मिळालेल्या माहितीनुसार, संबंधित चिमुरडी आपल्या आजोबांसोबत आठवडी बाजारात गेली होती. बाजारातून परतताना रस्ता ओलांडत असताना मागून भरधाव वेगाने आलेल्या कारने तिला जोरदार धडक दिली. या अपघातात ती गंभीर जखमी झाली.
स्थानिक नागरिकांनी तातडीने तिला उपचारासाठी रुग्णालयात रवाना केले. मात्र, रुग्णालयात पोहोचण्यापूर्वीच तिचा मृत्यू झाल्याचे वैद्यकीय सूत्रांनी सांगितले. अपघातानंतर घटनास्थळी नागरिकांची मोठी गर्दी झाली होती. दरम्यान, या अपघाताचा थरार सीसीटीव्ही कॅमेऱ्यात कैद झाला असून पोलिसांनी घटनेची नोंद करून पुढील तपास सुरू केला आहे.