Washim Malegaon Stone Pelting
वाशीम : मालेगाव शहरातील टिपू सुलतान चौक परिसरात नवदुर्गा विसर्जन मिरवणुकीदरम्यान दगडफेक झाल्याची घटना घडली. गुलाल उधळण्यावरून झालेल्या वादातून काही जणांनी मिरवणुकीच्या दिशेने दगडफेक केल्याचा आरोप आहे. या घटनेत काही वाहनांचे नुकसान झाले. याप्रकरणी चार जणांसह इतरांविरुद्ध विविध कलमांन्वये मालेगाव पोलीस ठाण्यात गुन्हा दाखल करण्यात आला आहे. पोलिसांनी वेळीच हस्तक्षेप केल्याने परिस्थिती नियंत्रणात आली असून, शहरात शांतता प्रस्थापित झाली आहे.
मिळालेल्या माहितीनुसार, बुधवार, २१ ऑक्टोबर २०२६ रोजी मालेगाव शहरात नवदुर्गा विसर्जन मिरवणुकीच्या पार्श्वभूमीवर पोलिसांनी चोख बंदोबस्त तैनात केला होता. रात्री साडेआठ ते नऊ वाजण्याच्या सुमारास जनता नवदुर्गा उत्सव मंडळाची मिरवणूक टिपू सुलतान चौक परिसरात पोहोचली. त्यावेळी गुलाल उधळण्याच्या कारणावरून अचानक काही जणांनी मिरवणुकीच्या दिशेने दगडफेक केल्याचे समोर आले. या प्रकारामुळे परिसरात काही काळ तणावाचे वातावरण निर्माण झाले. दगडफेकीत काही वाहनांचे नुकसान झाले.
घटनेचे गांभीर्य लक्षात घेऊन बंदोबस्तावर असलेल्या पोलिसांनी तातडीने हस्तक्षेप केला. त्यामुळे परिस्थिती नियंत्रणात आणण्यात यश आले. घटनेची माहिती मिळताच जिल्हा पोलीस अधीक्षक, अपर पोलीस अधीक्षक, उपविभागीय पोलीस अधिकारी आणि पोलीस निरीक्षक यांनी घटनास्थळी भेट देऊन परिस्थितीची पाहणी केली.
या प्रकरणी सरकारतर्फे सहायक पोलीस निरीक्षक पांडुरंग राजहंस इंगळे यांनी मालेगाव पोलीस ठाण्यात फिर्याद दिली. त्यानुसार सय्यद नदीम सय्यद युसुफ, सय्यद रफीक सय्यद युसुफ, सय्यद सुलतान आणि जब्बार शहा (सर्व रा. टिपू सुलतान चौक, मालेगाव) यांच्यासह इतरांविरुद्ध भारतीय न्याय संहितेच्या कलम १८९(२), १२५, ३२४(४), ३०० तसेच महाराष्ट्र पोलीस कायद्याच्या कलम १३५ अन्वये गुन्हा दाखल करण्यात आला आहे.
या प्रकरणाचा पुढील तपास पोलीस निरीक्षक राजेश खेरडे करीत आहेत. पोलिसांच्या सतर्कतेमुळे संभाव्य तणाव वाढण्यापूर्वी परिस्थिती नियंत्रणात आणण्यात आली. सध्या शहरात शांतता असून, या प्रकरणाचा तपास सुरू आहे.