वाशिम : अपघातात गंभीर जखमी झालेले दापुरी खुर्द येथील सतीश सुपाजी कंकाळ (वय ३२) यांचा १९ ऑक्टोबर रोजी नागपूर येथे उपचारादरम्यान मृत्यू झाला. मालेगाव-रिसोड मार्गावरील किन्ही घोडमोड फाट्याजवळ १० ऑक्टोबर रोजी त्यांचा अपघात झाला होता. नारायण त्र्यंबक इंगोले (वय ६०, रा. दापुरी खुर्द) हेही किरकोळ जखमी झाले होते. सतीश यांच्या निधनामुळे त्यांच्या पत्नी आणि दोन लहान मुलींवरील पितृछत्र हरपले आहे.
या प्रकरणी अज्ञात वाहन चालकाविरुद्ध गुन्हा दाखल करण्यात आला होता. मात्र, अपघातानंतर ११ दिवस उलटूनही संबंधित वाहनचालकाचा शोध लागला नसल्याने मृताच्या नातेवाईकांनी संताप व्यक्त केला. त्यांनी मृतदेहासह शिरपूर पोलीस ठाणे गाठून संबंधित वाहनचालकाला शोधून कठोर कारवाई करण्याची मागणी केली.
नारायण त्र्यंबक इंगोले यांच्या कामासाठी डिझेल आणण्यास गेल्यामुळे हा अपघात घडल्याचा दावा नातेवाईकांनी केला आहे. त्यामुळे अज्ञात वाहनचालकासह नारायण इंगोले यांचीही चौकशी करून दोषींवर कायदेशीर कारवाई करावी, अशी मागणी करण्यात आली. तसेच या प्रकरणाची वरिष्ठ स्तरावरून सखोल चौकशी करण्याची मागणी नातेवाईकांनी केली आहे.
पीडित कुटुंबाला आर्थिक मदतीची मागणी
घरातील कर्त्या व्यक्तीच्या निधनामुळे कंकाळ कुटुंबावर दुःखाचा डोंगर कोसळला आहे. दोन लहान मुलींच्या भविष्याचा प्रश्न निर्माण झाल्याने सरकारने पीडित कुटुंबाला आर्थिक मदत द्यावी. मुलींच्या संगोपनासाठी आवश्यक सहकार्य करावे, अशी मागणी नातेवाईकांनी केली आहे.