चंद्रपूर, पुढारी वृत्तसेवा : चंद्रपूर- घुग्घुस मार्गावरील एमआयडीसी परिसरातील स्टेट बँक इंडियातील लॉकर तोडून १४ लाखांची रोकड पळविणारे दोन आरोपी पोलिसांच्या हाती लागले आहेत. बँक लुटणाऱ्या टोळीत आणखी काही जणांचा समावेश आहे. त्यांचा पोलिसांनी शोध सुरू केला आहे.
मागील आठवड्यात शनिवार आणि रविवार सलग दोन दिवस बँकेला सुट्या होत्या. याच काळात चोरीची घटना घडल्याचे बोलले जात आहे. सोमवारी बँक पूर्ववत सुरू झाल्यानंतर कर्मचाऱ्यांना लॉकर तोडल्याचे दिसले. चोरट्यांनी अनेक दिवसांपासून या बँकेवर पाळत ठेवली होती. त्यामुळे सीसीटीव्ही फुटेजमध्ये चोरीची घटना येणार नाही, याची काळजी घेतली. त्यामुळे आरोपींना शोधण्यासाठी पोलिसांना शर्थीचे प्रयत्न करावे लागत आहे. सीसीटीव्ही कॅमेरे कुठे लागले आहे, याची इत्यंभूत माहिती चोरट्यांना होती. त्यामुळे बँक परिसरात प्रवेश करताच आधी सीसीटीव्ही कॅमेऱ्यावर त्यांनी एक विशिष्ट प्रकारच्या द्रव्याची फवारणी केली.
खिडकी तोडून आत गेले. गॅस कटरने लॉकर तोडले. या गडबडीत लॉकरमधील काही नोटासुद्धा जळाल्या. बँकेतील सुरक्षा यंत्रणा आधी बंद केली. त्यामुळे लॉकर सहजरित्या त्यांनी गॅस कटरने कापले. त्यातील चौदा लाख रुपये घेऊन ते पसार झाले. सीसीटीव्ही कॅमेऱ्याचे फुटेज संग्रहीत यंत्रणाही स्वतः सोबत घेऊन गेले. कोणताही सबळ पुरावा पोलिसांच्या हाती नव्हता. त्यामुळे आरोपींना शोधण्यासाठी पोलिसांना शर्थीचे प्रयत्न करावे लागले. अखेर ४ दिवसांनंतर दोन आरोपी पोलिसांच्या हाती लागले. ते चंद्रपूर शहरातीलच असल्याचे समजते. मात्र, त्यांच्या नावाबाबत गुप्तता पाळली आहे. या प्रकरणात आणखी काही जणांचा समावेश असून शोध सुरू आहे.
असा लागला आरोपींचा सुगावा
चोरट्यांनी बँक फोडली. तिथली सुरक्षा यंत्रणा आपल्या ताब्यात घेतली. बँकेतील सीसीटीव्ही आणि डीव्हीआरसुद्धा पैशासोबत घेऊन गेले. त्यामुळे आपण पोलिसांच्या हाती लागणार नाही, असा दाट विश्वास चोरट्यांनी होता. परंतु बँक परिसराच्या मार्गावर अनेक ठिकाणी सीसीटीव्ही लागले आहेत. याची कल्पना चोरट्यांनी नव्हती. पोलिसांनी आजूबाजूच्या परिसरातील सीसीटीव्ही फुटेज तपासले. तेव्हा घटना घडल्यानंतर एक संशयास्पद वाहन या मार्गाने रात्री गेल्याचे समोर आले. या चारचाकी वाहनांवर समोरच्या काचेवर एक वाक्य लिहीले होते. हेच वाक्य पोलिसांना आरोपीपर्यंत घेऊन गेले. या वाहनाचा पोलिसांनी शोध घेतला आणि पहिला आरोपी हाती लागला. त्यानंतर दुसऱ्याला अटक केली. पहिला अटकेतील आरोपी या वाहनावर चालक म्हणून काम करीत होता. दोन्ही अटकेतील आरोपी चुलत भाऊ आहे.
हेही वाचा