नागपूर: शहराच्या जवळ असलेल्या फन अँड फूड व्हिलेज वॉटर पार्कमध्ये एक अत्यंत दुःखद घटना घडली आहे. येथे आठ वर्षांच्या एका मुलाचा पाण्यात बुडून मृत्यू झाला. या घटनेमुळे खासगी वॉटर पार्कमधील सुरक्षेचा मुद्दा पुन्हा एकदा चर्चेत आला आहे.
पोलिसांनी दिलेल्या माहितीनुसार, मनीषनगर येथील रहिवासी असलेले अमित प्रकाश देशमुख हे १२ जून रोजी त्यांची पत्नी, दोन मुले आणि काही नातेवाईकांसोबत कोंढाळीजवळच्या फन अँड फूड व्हिलेज वॉटर पार्कमध्ये सहलीसाठी गेले होते. त्यांची मुले वॉटर पार्कमध्ये खेळत असताना, नैतिक अमित देशमुख (वय ८) याचा पाय घसरला आणि तो पाण्यात बुडाला.
नैतिक पाण्यात बुडाल्याचे लक्षात येताच त्याला तातडीने बाहेर काढून बेशुद्ध अवस्थेत वाडी येथील एका खासगी रुग्णालयात दाखल करण्यात आले. मात्र, डॉक्टरांनी त्याला मृत घोषित केले. या घटनेमुळे देशमुख कुटुंबावर दुःखाचा डोंगर कोसळला आहे.
या घटनेने खासगी वॉटर पार्कमध्ये मुलांच्या आणि सामान्यांच्या सुरक्षेबाबत गंभीर प्रश्न निर्माण केले आहेत. अशा ठिकाणी जीवरक्षक आणि वैद्यकीय सुविधा पुरेशा प्रमाणात उपलब्ध असतात का,
तसेच आपत्कालीन परिस्थितीत त्वरित मदत पोहोचते का, यांसारख्या बाबींची सखोल चौकशी होणे गरजेचे आहे. या घटनेमुळे परिसरात हळहळ व्यक्त होत असून, प्रशासनाने अशा घटनांची पुनरावृत्ती टाळण्यासाठी कठोर पावले उचलावीत, अशी मागणी जोर धरत आहे.