Ramanagar Railway Crossing Train Collision
नागपूर : रेल्वे फाटक ओलांडून घरी जात असताना भरधाव मालगाडीने दिलेल्या धडकेत एका १९ वर्षीय तरुणाचा जागीच मृत्यू झाला. ही घटना नवीन कामठी पोलीस स्टेशन हद्दीतील रमानगर रेल्वे क्रॉसिंगजवळ घडली. अक्षय डोंगरे (वय १९, रा. रमानगर, कामठी) असे मृत तरुणाचे नाव आहे.
मिळालेल्या माहितीनुसार, अक्षय काल रात्री आपल्या घराकडे जाण्यासाठी रमानगर रेल्वे क्रॉसिंग ओलांडत होता. याच वेळी नागपूरच्या दिशेने अत्यंत वेगाने जाणाऱ्या एका मालगाडीने त्याला जोरदार धडक दिली. ही धडक इतकी भीषण होती की, अक्षयचा जागीच मृत्यू झाला. पोलिसांनी या प्रकरणी आकस्मिक मृत्यूची नोंद केली असून पुढील तपास सुरू आहे.
मृत अक्षयच्या पश्चात आई, वडील, एक भाऊ आणि दोन बहिणी असा मोठा परिवार आहे. ऐन उमेदीच्या काळात अक्षयचा असा अपघाती मृत्यू झाल्याने संपूर्ण रमानगर परिसरात शोककळा पसरली आहे.