Nagpur Dowry Harassment allegations
नागपूर : नागपूरमधील एका हॅाटेलमध्ये आई आणि मुलाने आत्महत्या करण्याचा प्रयत्न केला. या घटनेत मुलाचा मृत्यू झाला, तर आई गंभीर आहे. रुग्णालयात तिची मृत्यूशी झुंज सुरू आहे. आईचे नाव जयंती तर मुलाचे नाव सुरज असून दोघेही बेंगळुरू येथील रहिवासी आहेत.
याबाबत अधिक माहिती अशी की, सुरजचे काही महिन्यांपूर्वी लग्न झाले होते. सुरजची पत्नी गनावीने बेंगळुरूमध्ये गुरुवारी आत्महत्येचा प्रयत्न केला. दरम्यान, हुंड्यासाठी तिचा छळ होत असल्याचा आरोप करीत या मृत तरुणीच्या नातेवाईकांनी बेंगलूरू येथील स्थानिक पोलीस स्टेशनसमोर जोरदार आंदोलन केले. बेंगलूरूमध्ये हे आंदोलन,कारवाईसाठी दडपण सुरु असताना आई आणि मुलगा भीतीपोटी नागपुरात दाखल झाले.
मानसिक विवंचनतेच दोघांनीही स्थानिक हॅाटेल रॉयल वीलामध्ये मुक्काम केला आणि याच हॉटेलमध्ये दोघांनीही मध्यरात्री गळफास घेत आत्महत्या करण्याचा प्रयत्न केला. अखेर या घटनेत तरुणाचा मृत्यू झाला.सोनेगाव पोलिस स्टेशनच्या हद्दीत हॉटेल रॉयल वीला येथे ही घटना घडली. मृतक तरुणाचे नाव सुरज शिवन्ना वय 30 वर्षे असे असून जयंती रामकृष्ण आप्पा वय 60 वर्षे असे आईचे नाव आहे. एका खासगी रुग्णालयात त्यांच्यावर उपचार सुरू असून प्रकृती स्थिर असल्याची माहिती आहे. या दोघांनीही गळफास घेतला. मुलाचा मृत्यू झाला. हॉटेल व्यवस्थापनाने सोनेगाव पोलिसांना माहिती दिली. पोलिसांनी सूरजचा मृतदेह पोस्टमार्टमसाठी पाठविला.