अकोला, पुढारी वृत्तसेवा : जिल्ह्यातील बार्शीटाकळी जवळ (अकोला शहरापासून २३ किमी अंतरावर) शनिवारी (दि.११) सायंकाळी पावणे सहा वाजण्याच्या सुमारास भूकंपाचे धक्के जाणवले. भुंकपाच्या या धक्क्यामुळे कोणतीही जीवीत किंवा वित्त हानी झाली नाही.
यासंदर्भात जिल्हा आपत्ती व्यवस्थापन कक्षाच्या वतीने देण्यात आलेल्या माहितीनुसार, अकोला हवामान विभागचे वैज्ञानिक सहायक मिलिंद धकिते व कार्तिक वनवे यांनी याबाबत भारतीय सेस्मॉलॉजीकल विभागाच्या अधिकृत संकेतस्थळाच्या आधारे ही माहिती दिली. त्यानुसार शनिवारी सायंकाळी पाच वाजून ४१ मि.१८ सेकंदांनी या धक्क्याची नोंद झाली.
२०५३० एन व ७०.०८० या अक्षांश रेखांशावर हे केंद्र असून रिक्टर स्केल वर ३.५० इतकी तीव्रता नोंदविण्यात आली. या धक्क्यांमुळे कोणतेही नुकसान झाले नाही, असे प्रशासनाच्या वतीने निवासी उपजिल्हाधिकारी संजय खडसे यांनी स्पष्ट केले आहे.