गोंदिया : जिल्ह्यातील अर्जुनी मोरगाव शहरातील प्रभाग क्र. ५ येथील अडीच वर्षाच्या चिमुकल्याचा विहिरीत पडून दुर्देवी मृत्यू झाला. ही घटना आज (दि.१७) दुपारी २.३० च्या सुमारास घडली. रेयांस संदिप शहारे (अर्जुनी मोरगाव) असे या चिमुकल्याचे नाव आहे.
रेयांस हा घरासमोर खेळत असताना अचानक आईची व घरच्या मंडळींची नजर चुकवून अंगणातील विहीरीकडे गेला. यावेळी खेळताना त्याचा विहिरीत पडून दुर्देवी मृत्यु झाला. रेयांस दिसत नाही म्हणून घरच्यांनी सर्वत्र शोधाशोध केली. पण रेयांस कुठेच सापडला नाही. प्रभागातील काही लोकांनी विहीरीत डोकावून पाहिले असता तो नजरेश पडला. त्याला बाहेर काढून तातडीने जवळच्या रुग्णालयात डॉक्टरांनी त्याला तपासून मृत घोषित केले. रेयांसचे वडील संदिप शहारे हे मोलमजुरी करुन कुटुंबाचा उदरनिर्वाह करत असून रेयांस हा त्यांचा एकुलता एक मुलगा होता. या दुर्देवी घटनेमुळे अर्जुनी मोरगाव परिसरात हळहळ व्यक्त केली जात आहे.